Хавфсизлик Кенгашининг фавқулодда йиғинида БМТ Бош котиби ҳам иштирок этмоқда
АҚШ, Франция ва Буюк Британия шанба куни эрталаб Сурия ҳудудига ҳаммаси бўлиб, 105 та ракета йўналтирди. Бу ҳақда Пентагонда ўтказилган махсус брифинг давомида АҚШ Ҳаво кучлари бошлиқлари штаби вакили генерал Кеннет Маккензи маълум қилган. ТАССнинг хабар беришича, зарбалар аниқ кўрсатилган 3 та нуқтага йўналтирилган. “Биз кўзлаган манзилимизга ҳеч қандай қаршиликсиз зиён етказдик”, деган Маккензи. Унинг таъкидлашича, “Сурия ҳаво ҳужумига қарши мудофаа тизимларининг жавоби ҳеч қандай самарага эришмади, ундан кўпроқ оддий халқ учун хавф юзага келди”. Ҳозирда зарбалардан кўрилган зиён кўлами ҳисоблаб чиқилмоқда.
Пентагон вакилининг сўзларига қараганда, Дамашқ яқинида тадқиқот марказига қарата 76 та ракета, жумладан 56 та Tomahawk ракетаси учирилган, иккинчи манзил-Хомс вилоятига 22 та, учинчи объектга 7 та ракета йўналтирилди.
Россия Федерацияси Мудофаа вазирлиги эса 103 та ракета учирилгани ҳақида маълум қилганди.
Reuters, хабарида қайд этилишича, Россия етакчиси Владимир Путиннинг сўровига биноан айни дамда БМТ Хавфсизлик Кенгашининг фавқулодда йиғини бўлиб ўтмоқда.
Қатор давлат раҳбарлари Қўшма Штатлар, Буюк Британия ва Франциянинг Сурияга берган зарбаларига турлича муносабат билдиришяпти. Жумладан, Туркия Президенти Режеп Тойип Эрдўған ракета ҳужумларини тўғри деб ҳисобламоқда.
Сурия президенти Башар Асад ракета зарбаларидан сўнг баёнот билан чиқиб, бу ҳужум Сурия халқининг терроризм билан курашдаги бирдамлигини фақатгина кучайтиради, деган фикрни билдирди.
Эслатиб ўтамиз,Сурия ҳарбий ва фуқаролик инфратузилмаларига қаратилган давомий ракета ҳужумлари маҳаллий вақт билан 3:42 дан 5:10 гача амалга оширилган. АҚШ, Буюк Британия ва Франция ҳаво кучлари томонидан йўлланган зарбалар самолётлар ва кемалардан йўналтирилган. Аввалроқ, Вашингтон, Лондон ва Париж, ҳужум Суриянинг Дума шаҳрида кимёвий қурол қўлланилганига қарши жавоб бўлди, деб баёнот берганди.
Думада 7 апрель куни содир бўлган воқеадан сўнг Россиянинг низолашаётган томонларни муросага келтириш маркази вакиллари 9 апрель куни воқеа жойида бўлиб, текширув ўтказган ва кимёвий қурол қўлланилганига далил топмаганини маълум қилганди.
Шанба куни ушбу ҳудудда Кимёвий қуролларни таъқиқлаш ташкилоти экспертлари иш бошлади.
