Бундан бир неча кун аввал 1 май куни Самарқандга Нижневартовскдан йўлга чиққан “Победа” раритет автомобиллари автокарвони келиши ҳақида хабар берган эдик.
Бугун Самарқандга медиа-экспедиция иштирокчилари режалаштирилган муддатдан аввал етиб келишди. Бироқ машиналарсиз.
Кеча 5 та “Победа” ва 2 та “Патриот” автомобилларида 15 нафар жаҳонгашта россияликлар Тошкент шаҳрида кутиб олинган эди.
"Зарафшон" нашри хабарига кўра, жамоа аъзолари бугун Самарқандга келиб, шаҳардаги Мотамсаро она ҳайкали майдонида уруш фахрийлари билан учрашди.
Ёши 90 дан ошган Евгений Солдатов ва Михаил Колмогоров меҳмонлар билан мулоқотда бўлиб, уларнинг саволларига жавоб беришди.
Шундан сўнг меҳмонлар Самарқанддаги тарихий обидаларни зиёрат қилишди.
— Биз 2018 йилги экспедициямизни II Жаҳон урушида фронт ортида меҳнат қилганларга бағишладик, дейди Анна Грибинча, Югра Думаси қошидаги Ёшлар парламенти аъзоси. – Биз уларга ҳурмат бажо келтиришни мақсад қилдик.
Медиа-экспедиция ташкилотчиларининг таъкидлашича, автомобилларнинг Самарқандгача етиб кела олмаганининг сабаби иссиқ об-ҳаводир. Машиналар бундай шароитда тез қизиб двигателлари ишдан чиқиши мумкин экан.
Режага кўра, медиа-экспедиция 9 майда Нижневартовскгача етиб бориши лозим.
Ушбу тадбир Россиянинг Ханти-Мансийск автоном округи Думаси қошидаги Ёшлар парламенти томонидан ташкиллаштирилган.
Машиналар Россия, Қозоғистон, Қирғизистон ҳамда Ўзбекистон шаҳарларидан ўтиб Тошкентгача етиб келган.
Замира БОЛТАЕВА (фото)
