Камчатканинг Ковран қишлоғида айиқдан қутулиш учун қочган балиқчини дарё суви оқизиб кетди, деб хабар берди Vesti.ru нашри.
Маълум бўлишича, балиқчи қайиғини қирғоқда қолдириб, дўстларига қўнғироқ қилиш учун тепаликка кўтарилган. Тепадан туриб, унинг қайиғини ағдаришга ҳаракат қилаётган айиқни кўрган. Балиқчи тош отиб, айиқни ҳайдаган.
Бироздан кейин қирғоққа қайтган балиқчига айиқ яна ҳужум қилган. Унинг ўзини сувга отишдан бошқа иложи қолмаган. Оқибатда кучли оқим балиқчини оқизиб кетган. Орадан бир кун ўтгандан кейин балиқчининг жасади сувдан олиб чиқилган.
Воқеага гувоҳ бўлган маҳаллий балиқчилик корхонаси ходимлари эркакка ҳеч қандай ёрдам кўрсата олишмаган. Ҳужумдан кейин айиқ хотиржам равишда ўз йўлида давом этган.
