Афғонистонда президентлик сайловлари иккинчи турининг овоз бюллетенларини текшириш ва қайта ҳисоблаш ишлари якунланди. Мустақил сайлов комиссиясининг хабар қилишича, яқин кунларда овоз бериш натижалари эълон қилинади.
МСК маълумотларига кўра, сайлов комиссиясининг аудит ходимлари 50 кун давомида шубҳали бўлган 23 мингга яқин овоз бюллетенларини қайта кўриб чиқишди. Иш жараёнини 201 нафар чет эллик кузатувчилар, шу қаторда БМТ экспертлари ва президентликка номзод Абдулла Абдулла ҳамда Ашраф Ғани Ахмадзай вакиллари назорат қилиб боришди.
Сайлов натижалари эълон қилинадиган кун санаси аниқ белгиланмади. Аммо, БМТ вакиллари бу учун бир неча ҳафта вақт кетиши кераклигини айтишмоқда.
Эслатиб ўтамиз, 5 апрель куни ўтказилган президентлик сайловининг биринчи турида давлат раҳбари лавозими учун курашаётган Ташқи ишлар собиқ вазири Абдулла Абдулла 45,0 фоиз ва молия собиқ вазири Ашраф Ғани Ахмадзай 31,6 фоиз овоз тўплаган.
14 июнь куни ўтказилган сайловнинг иккинчи турида Ахмад Ғани 56,44 фоиз, Абдулла Абдулла эса 43,56 фоиз овоз тўплаган.
Шундан сўнг, Абдулла Абдулла сайлов натижаларини тан олмади ва “параллель ҳукумат”ни ташкил қилиш ниятида эканлигини маълум қилди.
Иккала номзод ҳам бир-бирини сайловда фирибгарлик қилганликда айблади.
Июль ойида эса АҚШ бош котиби Жон Керри икки номзодни овозларни қайта ҳисоблаб чиқиш кераклигига кўндирганди.
