Альянснинг амалдаги бош котиби Андерс Фог Расмуссен НАТО саммити иштирокчиларига ташкилотнинг янги бош котиби Йенс Столтенбергни таништирди, деб хабар беради Euronews.
55 ёшли Столтенберг бош котиб лавозимидаги фаолиятини 1 октябрдан бошлайди.
Йенс Столтенберг 2000-2001 ва 2005-2013 йиллардаги Норвегия бош вазири бўлган. Айнан унинг даврида Норвегия тарихидаги энг катта ҳалокатли террористик ҳаракатлар амалга оширилган. 2011 йилнинг июль ойида норвегиялик Андерс Брейвик Ослода қўпорувчилик ҳаракатини амалга оширган ва Утёйа оролидаги ўсмирлар оромгоҳига бориб, ўнлаб ёшларни отиб ташлаган. Умумий ҳисобда Брейвик амалга оширган ҳаракатлар оқибатида 77 киши вафот этган.
Норвегия бош вазири лавозимида Столтенберг мунтазам НАТО операцияларини маъқуллаб келган. Хусусан, 11 сентябрдан сўнг АҚШнинг терроризмга қарши курашиши ва НАТО ҳарбийларини Афғонистонга юборишни қўллаб-қувватлаган. Шунингдек, Столтенберг “Глобал исиш”га қарши курашчи номи билан ҳам машҳур. У БМТнинг иқлим бўйича махсус вакили лавозимида ҳам фаолият юритган.
Уэльсда бўлиб ўтган саммит Андерс Фог Расмуссен учун сўнггиси бўлди. 2016 йили Варшавада бўлиб ўтадиган навбатдаги саммитга тайёргарлик ишларини энди Йенс Столтенберг олиб боради.
Қайд қилиб ўтамиз, Ташқи ишлар вазири Абдулазиз Камилов бошчилигидаги Ўзбекистон Республикаси делегацияси Уэльсдаги НАТО Саммитининг Афғонистон масаласи бўйича махсус йиғилишда иштирок этди.
