Malaysia Airlines авиакомпаниясининг Украинада ҳалокатга учраган самолёти бўйича тергов ишларининг дастлабки натижалари эълон қилинди. Бу ҳақда ИТАР-ТАСС агентлиги хабар бермоқда.
Унга кўра, лайнер техник носозликлар мавжудлиги ҳақида ҳеч қандай сигнал бермаган. Бўлакларнинг жойлашиши эса самолёт ҳавода бўлиниб кетганлигини тасдиқламоқда. “MH17 рейси билан учган Malaysia Airlines авиакомпаниясининг Boeing 777-200 самолёти унга катта тезликда, кўп объектларнинг тўқнашиши оқибатида бўлакларга бўлиниб кетган”,-дейилади ҳужжатда.
“Ҳозирга келиб, экспертлар бўлакларни тўлиқ ўрганиб чиқа олишмади. Аммо, суратлар бўлакларда кўпгина тешиклар борлигини кўрсатмоқда. Самолёт фюзеляжи ва кабинасидаги шикастлар самолётни ташқи томондан кўпгина объектлар тешиб ўтгани тўғрисида гувоҳлик бермоқда. Етказилган шикастлар оқибатида лайнер структураси бутунлигини йўқотган ва ҳавода бўлиниб кетган. Буни парвоз маълумотлари, диспетчер билан алоқа ҳамда самолётнинг радар экранларидан қисқа муддатда йўқолиб қолиши ҳам тасдиқламоқда”,-дейилади тергов ишларининг дастлабки ҳисоботида.
Ҳужжатда қайд қилинишича, самолёт “қора қути”сига ёзиб олинган экипаж аъзоларининг суҳбатлари ҳам лайнер носоз бўлмагани ва ҳеч қандай фавқулодда вазият юзага келмаганини кўрсатмоқда. Украина диспетчер хизматининг таслиқдашича, экипаж ҳеч қандай фавқулодда вазият ҳақида хабар бермаган ҳамда украиналик диспетчерларнинг 17:20 ва17:22 (Москва вақти бўйича) оралиғида берган сўнгги хабарига жавоб келмаган.
“Амстердамдан учишдан аввал лайнер парвоз учун яроқли бўлган ва ҳеч қандай техник носозлик бўлмаган. Boeing профессионал учувчилар томонидан бошқарилган”-дейилади ҳужжатда.
