Тошкент шаҳар ҳокимлиги томонидан 1-октябрь — Ўқитувчи ва мураббийлар куни муносабати билан “Сиз доимо ардоғимиздасиз” деб номланган байрам тадбири ташкил этилди, деб ёзмоқда ЎзА.
Пойтахтимиздаги “MultiMaFe” ресторанида ташкил этилган байрам дастурига узоқ йиллик тажрибага эга, баркамол авлод тарбиясига ўзининг муносиб ҳиссасини қўшиб келаётган фидойи устоз ва мураббийлар таклиф этилди.
– Байрам арафасида устоз ва мураббийларимизни қутлаш мақсадида Тошкент шаҳар ҳокимлиги томонидан илк бор мана шундан катта тадбир ташкил этилди, – дейди Тошкент шаҳар ҳокимлиги матбуот хизмати координатори Тўрабек Тўраев. – Тошкент шаҳридаги 80 нафарга яқин мактаб, касб-ҳунар коллежлари ва академик лицейлар ва олий ўқув юртлари ўқитувчиларини таклиф этдик. Биз имкон даражасида узоқ йиллар давомида таълим тизимида намунали фаолият юритган ўқитувчиларни саралаб байрам дастурига жалб этишга ҳаракат қилдик.
Байрам дастурига таклиф этилган устоз ва мураббийлар кўп йиллик самарали меҳнати ва жамоат ишларидаги фаол иштироки учун Тошкент шаҳар ҳокимлигининг эсдалик совғалари ва ташаккурномаси билан тақдирланди.
