Истанбул техника университети ректори Мехмет Каража бошчилигидаги Туркия Республикаси делегацияси 2018 йилнинг 18-20 декабрь кунлари Тошкент шаҳрига илк бор ташриф буюрди.
Музокараларда икки давлат ОТМлари ўртасида ҳамкорликка асос солиш, талабалар ва профессор-ўқитувчилар академик алмашинувини йўлга қўйиш, техника соҳасига ихтисослаштирилган қўшма факультет (Тошкент давлат техника университети билан биргаликда) ҳамда ҳамкорликдаги илғор технопаркларни (техника йўналишидаги олий таълим муассасалари консорциуми асосида) барпо этиш билан боғлиқ қатор масалалар муҳокама қилинди.
Шунингдек, Истанбул техника университетида ўқув дастурларининг мутаносиблигини таҳлил қилиш ва таққослаш (қўшма факультет ташкил этиш учун), илм-фаннинг ишлаб чиқариш билан интеграциясини ўрганиш мақсадида
- Тошкент давлат техника университети,
- Тошкент давлат иқтисодиёт университети,
- Тошкент кимё-технология институти,
- Тошкент архитектура-қурилиш институти,
- Тошкент тўқимачилик ва енгил саноат институти,
- Тошкент шаҳридаги Турин политехника университети ҳамда М.Улуғбек номидаги Ўзбекистон миллий университети ҳузуридаги Яримўтказгичлар физикаси ва микроэлектроника илмий-тадқиқот институти раҳбарлари, ўқув-услубий бошқарма бошлиқлари, профессор-ўқитувчилари ва олимларини Истанбул шаҳрига яқин кунларда хизмат сафарига юборишга келишилди.
Истиқболда, академик алмашинувни амалга ошириш, қўшма таълим дастурлари ва факультетлар, илғор технопаркларни ташкил этишда қуйидаги йўналишларида ҳамкорлик қилиш режалаштирилди:
- нурли терапия (жумладан, протон тезлатгичлари асосидаги тиббиёт асбоб-ускуналарида инсонларни даволаш);
- таълим ва ишлаб чиқариш соҳаси (жумладан, муҳандислик физикаси, кимё, микроэлектроника, биотехнология соҳаларида янги ишланмаларни яратиш ва бу орқали яратиладиган маҳсулотнинг локализациясини таъминлаш);
- қишлоқ ҳужалиги (генетика ва ген инженерияси);
- архитектура ва қурилиш;
- дизайн;
- ахборот-коммуникация технологиялари (IT-технологиялари).
