Суд-экспертлик фаолиятини янада такомиллаштириш чора-тадбирлари тўғрисидаги Президент қарори қабул қилинди. Бу ҳақда Адлия вазирлигининг "Ҳуқуқий ахборот" канали хабар берди.
Қарорга мувофиқ, эндиликда нодавлат суд-экспертиза ташкилотлари ташкил этилади ва уларга суд экспертизаларининг айрим турларини ўтказиш ҳуқуқи берилади.
Нодавлат суд-экспертиза ташкилотларининг суд экспертлари қайта тайёрлаш ва малака ошириш курсларини давлат муассасаларида ўтайди ҳамда уларга суд эксперти сертификати берилади.
Сертификатга эга суд экспертларининг Ягона реестри Адлия вазирлигининг расмий веб-сайтида юритилади.
Сертификатсиз фаолият юритиш тақиқланади.
Суд экспертизасини тайинлаган орган нодавлат суд-экспертиза ташкилоти томонидан ўтказилган суд экспертизаси хулосасига қўшилмаган тақдирда, такрорий суд экспертизаси фақат давлат суд-экспертиза муассасалари томонидан амалга оширилади.
Қарор билан адлия вазирига Х.Сулаймонова номидаги Республика суд экспертизаси маркази томонидан бажариладиган ишлар, кўрсатиладиган хизматлар бўйича нархларни мустақил равишда белгилаш ҳуқуқи берилди.
Суд-экспертиза ташкилотлари 2022 йил 1 январга қадар четдан олиб келинадиган асбоб-ускуналар, реактивлар ва сарфлаш материаллари учун божхона тўловларидан озод қилинди.
Илмий тадқиқотлар натижаларини суд-экспертлик фаолиятига татбиқ этиш, суд экспертизаларини ўтказиш услубиётини такомиллаштириш, давлат суд-экспертиза муассасаларининг кадрлар салоҳиятини мустаҳкамлаш суд-экспертлик фаолиятини ривожлантиришнинг устувор йўналиши этиб белгиланди.
