Магнитогорскда 8 кишини қутқарган ўзбекистонлик Оламафруз Абдуллаев куни кеча Россия Кудо федерацияси ва Челябинск вилояти Кудо федерацияси президентлари томонидан миннатдорлик хатлари билан тақдирланди. Бу ҳақда Sputnik хабар қилди.
Ҳужжатда Абдуллаевга 2018 йилда Магнитогорск шаҳри учун энг қийин бўлган вақтда қаҳрамонлик, жасорат, меҳрибонлик ва раҳмдиллик кўрсатганлиги учун миннатдорлик билдирилган.
“Ҳар бир сонияда ўз ҳаётини хавф остига қўйган ҳолда қаҳратон совуқда 12 соатдан ортиқ вақт давомида бетон вайроналар остидан одамларни қутқарган. Алан, сен билан Россия фаҳрланади ва мамлакатимизнинг барча аҳолиси миннатдорлик билдиради”- дейилган ҳужжатда.
Ушбу ёрлиқлар Абдуллаевга Кудо бўйича мусобақанинг очилиш маросимида тантанали равишда топширилди.
Ўзбекистонлик йигит саккиз кишига вайроналар остидан чиқишга ёрдам бергани ҳақида хабар берган эдик.
Қутқарилган тожикистонлик Улфатовнинг амакиси Бахтиёр Султонов ва Ўзбекистоннинг Россиядаги элчихонаси вакиллари Оламафрузга миннатдорлик билдиришди.
Ўзбекистонлик йигит эса ўзини қаҳрамон деб ҳисобламайди.
Маълумот учун: Абдуллаев Сурхондарё вилоятининг Сариосиё туманида туғилган. Термезда коллежни тамомлаган.
Россияга эса саккиз йил олдин келган.
Йигитнинг ёши 23да, қурилишда ишлайди. Бўш вақтида “кудо” спорт тури билан шуғулланади. Унинг мураббийси Челябинск вилояти кудо федерацияси президенти Владимир Остапченко.
Эслатиб ўтамиз, 2018 йил 31 декабрь куни Россиянинг Челябинск вилояти Магнитогорск шаҳрида маиший газ портлаши оқибатида кўпқаватли уйларнинг бирининг подъезди ўпирилиб тушган эди. Сўнгги маълумотларга кўра, ушбу фожиада 39 нафар киши ҳалок бўлди.
