«Билайн» алоқа оператори томонидан ўтказилаётган акция доирасида октябрь ойида квартира ютиб олган андижонликлар можароси ижобий ҳал бўлди, деб хабар бермоқда Xushnudbek.uz.
Маълум бўлишича, «Билайн» компанияси томонидан ўтказилаётган «Инновация» глобал акцияси доирасида андижонликларга квартира ютуғи чиққан. Ютуқ чиққан рақам фойдаланувчининг онаси, 2010 йилда вафот этган Роҳатой опа номига расмийлаштирилган бўлган. Онасининг вафотидан кейин оила ушбу рақамни онасидан хотира сифатида 4 йил давомида фойдаланиб келган. Бироқ рақамни қайта расмийлаштирмаган.
Ютуқ чиққандан сўнг, улар «Билайн» компаниясининг Андижон вилояти бўйича бош офисига мурожаат қилган. Ҳудудий офис вакиллари дастлаб ютуқни беришни, уни олиш учун қандай ҳужжатлар кераклигини айтган. Маълум муддат ўтгач эса, улар квартирани бермасликка ҳаққи борлигини, ушбу масала фақат Тошкентдаги Бош офис орқалигина ҳал бўлиши мумкинлигини таъкидлаган.
Тошкентдаги Бош офисга мурожаат қилинганда, квартирани бермасликка узил-кесил қарор қилинмагани, ҳозирда муҳокама қилинаётгани, 14 кун ичида натижаси ҳақида хабар берилиши маълум қилинган.
Ҳуқуқшунос Хушнудбек Худайбердиевнинг фикрича, бундай вазият Ўзбекистонда биринчи марта кузатилаётган бўлгани учун умумий қоидалар бўйича ҳукм қилишга уринилса, «Билайн» компанияси ютуқни бермасликни истаса, бунга ҳақли эканлиги ойдинлашади.
Бироқ «Билайн» биргина бу ҳолатнинг ўзидан ташқари унинг йирик компания имижига таъсир қилишини ҳам ўйлаб қарор қилган. 15 октябрь куни компаниянинг бош офисига чақирилган андижонлик оила вакилига турли расмийлаштириш ишларидан кейин, акция қоидаларига кўра ғолибга ўзи доимий рўйхатдан ўтган ҳудуддан 2 хонали уй қийматидаги пул мукофоти (ғолиб истагига кўра) − 99 миллион 773 минг 520 сўм, 22 фоизлик даромад солиғи чиқариб ташланганда 77 миллион 823 минг 345 сўм топширилган.
