Вьетнамдаги фабрикалардан бирининг 28 ёшли ишчиси ярим йил давомида йиққан пулига яхши кўрган қизи учун Айфон 6 сотиб олмоқчи эди. Apple нинг сўнгги моделини харид қилиш мақсадида у Сингапурга келди. Бироқ дўкон ходимлари смартфон нархи минг долларга қимматлашганини айтишди. Бу хабар харидорга кутилмаган “зарба” бўлди.
Mirror нашрининг ёзишича, вьетнамлик Пан Ван Тай исмли ишчининг маоши 200 доллардан ошмайди. Севгилиси учун атайин смартфон олишга бошқа шаҳарга келганда эса Mobile Air дўконидан нохуш хабар эшитди.
Сотувчилар ушбу харидорга смартфон учун дўкон сайтида эълон қилинган 730 доллар нархдан ташқари, яна минг долларни “кафолат хати”га тўлаши кераклигини айтишди. Вьетнамлик алданганини тушуниб етгач, тиззаси билан чўккалаган ҳолда сотувчилардан эълон қилинган нарх бўйича пули тўланган айфонни беришларини сўраб, ялина бошлади. Лекин улар бечора харидор устидан кулдилар холос.
Чақирув бўйича келган полиция ҳам харидорга ёрдам беролмади. Натижада, дўкон ходимлари вьетнамликка фақат 250 долларни қайтиб беришга рози бўлишди. Бироқ вьетнамлик ошиқнинг ҳикояси ҳали якунига етмади. Унинг бахтига сотувчилардан смартфонни ёлвориб сўраган ҳолати ролик сифатида ёзиб олиниб, Интернет тармоғида тез тарқаб кетди. Буни кўрган раҳмдил сингапурликлар янги Iphone 6 учун етадиган маблағ йиғишни ташкиллаштиришди.
Ташкиллаштирувчилардан бирининг айтишича, ҳозирда 12 минг долларга яқин маблағ йиғилган, бу нафақат янги телефонга, балки Сингапурда яшаш учун ҳам етади. “Биз хорижликка ўз меҳмондорчилигимизни намойиш этмоқчимиз ва фирибгарлар, ўғрилар милллати эмасмизлигимизни исботламоқчимиз”, - дейди у.
Аниқланишича, Mobile Air дўкони шу каби фирибгарликларга аввал ҳам йўл қўйган. Айни вақтда унинг эгаси қочқинликда эканлиги хабар қилинмоқда.
Фото: mirror.co.uk
