Жорий йилда “Cinema-Market” киностудиясида ишлаб чиқарилган “Ақлтойнинг саргузаштлари" 3D ўлчамдаги янги анимацион фильм “Ўзбеккино” Миллий агентлиги қошидаги бадиий кенгашнинг навбатдаги йиғилишида муҳокама қилинди.
10 ноябрда бўлиб ўтган йиғилишда мазкур мультфильмда янги анимацион технологиялардан яхши фойдаланилгани ва у ғоявий-бадиий жиҳатдан анча пухта эканлиги эътироф этилди ҳамда жузъий камчиликлари тузатилгандан сўнг, катта экранга чиқариш тавсия қилинди.
Анимацион фильмнинг сценарий муаллифи Муаззам Иброҳимова, Шаҳноза Ҳакимова ва Элмурод Шойимқулов. Постановкачи режиссёр ва рассом Элмурод Шойимқулов.
Шу билан бирга, агентлик бадиий кенгаши “Ўзбекфильм” киностудиясида тасвирга олинган “Болалик синовлари” бадиий фильмининг иш вариантини ҳам кўрикдан ўтказишди.
Фильмнинг овозлаштирилмаган варианти муҳокамаси чоғида бартараф этилиши керак бўлган камчиликлар мавжудлиги, айниқса, фильмни овозлаштиришда бадиий асоснинг тил ва услубини сақлаб қолишга алоҳида эътибор қаратиш лозимлиги қайд этилди. “Болалик синовлари” бадиий фильмини кинорежиссёр Ҳамидулла Ҳасанов ёзувчи Шукур Холмирзаев ҳикоялари мотивлари ҳамда Маҳмуд Тўйчиев, Сайёра Холмирзаева ва Ҳамидулла Ҳасанов сценарийси асосида тасвирга олган.
“Ўзбеккино” МА матбуот хизмати берган хабарга кўра, картина камчиликлардан тузатилгач, қайта бадиий кенгаш кўригидан ўтказилади ҳамда йил охирига қадар ёш томошабинлар ҳукмига ҳавола этилади.
manba:uz24.uz
