Террорчи Усама бен Ладенни отиб ташлаган америкалик собиқ ҳарбий хизматчи Роберт O’Нил Fox News каналига берган интервьюсида Махсус операциялар кучлари бўлинмаси аъзоларининг ёки ўлимга, ёки Покистон қамоқхонасида узоқ йиллик ҳибсга тайёрланганини маълум қилди. Бу ҳақда «РИА Новости» хабар бермоқда.
«Биз у ерга бориб, ортга қайтиб келмоқчи эмасдик. Биз уй портлаганида ҳалок бўлишга ёки у ерда узоқ қолиб кетиб, натижада покистонликлар қўлига тушишга ва умримизнинг қолган қисмини у ердаги қамоқхонада ўтказишга тайёрланган эдик», — деди O’Нил.
Бундан ташқари, ҳарбий хизматчи ҳақиқатан террорчини кўрган сўнгги киши бўлганини таъкидлади ва ҳалигача бу иши тўғри бўлган-бўлмаганлиги ҳақида ўйлашини айтди.
Усама бен Ладен 2011 йил майида Покистоннинг Абботобод шаҳри ташқарисида Америка махсус бўлим ходимларининг операцияси чоғида йўқ қилинган. Экспертизалар якунлангач, «Ал Қоида» раҳбарининг жасади қатъий махфийлик шароитида денгизга дафн қилинган.
