2014 йилнинг 15 декабридан Хоразмнинг сайёҳлик салоҳиятини юксалтириш, авиайўловчиларга хизмат кўрсатиш сифатини яхшилаш мақсадида “Урганч” аэропортида учиб кетиш терминали фойдаланишга топширилди, дея хабар бермоқда uz24.uz нашри.
Янги терминал йўловчиларга жаҳон стандартларига жавоб берувчи замонавий қулайликларга эга. Эндиликда бинода халқаро, маҳаллий авиайўналишлар ҳамда CIP заллари йўловчилар хизматида бўлиб, уларнинг ҳар бирида алоҳида пул айирбошлаш шаҳобчаси, она-бола хонаси, тиббиёт пункти мавжуд.
Бинода авиация хавфсизлигини юқори даражада таъминлаш мақсадида замонавий муҳандислик ва технологик ускуналар ўрнатилган. Шунингдек, Duty-free дўкони, кафетерий ҳам ишлаб турибди.
Лойиҳанинг бош лойиҳаловчилари «O'zshaharsozlik LITI» ДУК, пудратчи ташкилот «93-Maxsustrest» OАЖ ҳисобланади.
Эслатиб ўтамиз, шу йилнинг май ойида учиб келувчи йўловчилар учун жаҳон стандартлари талабларига жавоб берувчи янги терминал ҳам эксплуатацияга топширилган эди.