2014 йил 19 декабр – АҚШ пойтахти Вашингтон шаҳридаги Жорж Вашингтон номидаги университетнинг Л.Эллиот номидаги Халқаро муносабатлар мактабида 1969 йили таниқли ўзбек ёзувчиси Абдулла Қодирийнинг “Ўтган кунлар” романи асосида “Ўзбекфильм” киностудиясида тасвирга олинган “Ўтган кунлар” бадиий фильми намойиш этилди.
Бу ҳақда “Ўзбеккино” миллий агентлиги хабар берди. Ушбу фильм номи зикр этилган мактаб Ж.Вашингтон номидаги университетнинг Европа, Россия ва Евросиё тадқиқотлари институтининг Марказий Осиё дастури билан ҳамкорликда ўзбек кино санъатига бағишлаб ўтказган тадбирда кўрсатилди, деб хабар беради «Жаҳон» ахборот агентлиги.
Хабар қилинишича, “бундай тадбир АҚШ аҳолисини ўзбек халқининг тарихий мероси, маданий-маънавий қадриятлар билан яхшилаб таништириш мақсадида ўтказилмоқда”. – Ушбу картина ўзбек мумтоз киносининг ажойиб намуналаридан биридир. Ўзбек кинематографиясига фильмлар мавзулари ранг-баранглиги, жанрлар ва йўналишлар кўплиги хосдир, – деди тадбирда нутқ сўзлаган Л.Эллиот номидаги Халқаро муносабатлар мактабининг Марказий Осиё дастури директори М.Лорел хоним.
Бундан ташқари, М.Лорел Ўзбекистонда кино санъати жадал ривожланиб бораётгани ва ушбу йўналишда ҳукумат қўрсатаётган кўмак муҳим аҳамият касб этаётганини қайд этди. “Америка томони келаси йили Вашингтон шаҳрида “Ўзбек киноси ҳафталиги”ни ўтказишга қизиқиш билдирди ва унга мамлакатимизиннг машҳур киноижодкорларини таклиф қилмоқчи”, деб ёзади агентлик.
