Митинг иштирокчилари парламент биноси атрофида жонли занжир ҳосил қилди

Бугун, 25 ноябрь куни икки юзга яқин одам Қирғизистон пойтахти Aла-Тоо марказий майдонида коррупцияга қарши митингга йиғилди. Бу ҳақда хориж ОАВга асосланиб ЎзА хабар берди.

ТАССнинг Бишкек полициясига асосланиб, маълум қилишича митинг иштирокчилари давлат раҳбари ва миллий парламент жойлашган бино ёнида жонли занжир ҳосил қилган. 

“Биздаги маълумотларга кўра, митинг ташкилотчилари унинг иштирокчиларини тадбирни тугатишга чақирган, аммо ҳамма тарқалишни хоҳламаган, баъзилари Оқ уй (парламент биноси ва президент аппарати) яқинида жонли занжир уюштиришга ҳаракат қилишди“, - деган агентлик суҳбатдоши.

Маълумотларга кўра, митингда жами 400 киши иштирок этган. Кейинчалик, Aла-Тоо майдонидаги одамлар сони тахминан 100 кишига қисқарган.

Қирғизистон пойтахтида бир қатор жамоат ташкилотлари ташаббуси билан ташкил этилган митинг иштирокчилари ҳукумат расмийларидан мамлакат божхона органларидаги коррупция бўйича тергов ўтказишни ва айбдорларни жазолашни талаб қилди. Бунга “Озодлик“ радиостанцияси журналистлари томонидан ўтказилган суриштирув сабаб бўлиб, унда мамлакат божхона ходимлари ишидаги коррупция схемалари маълум қилинган. 

Бишкекнинг марказий майдонидаги коррупцияга қарши митинг ҳукумат билан келишилмаган бўлса-да, ҳуқуқ-тартибот идоралари ходимлари намойишчиларни тарқатиб юбормаган. Қирғизистон Хавфсизлик кенгаши котиби Дамир Сагинбаев бугун Бишкекда бўлиб ўтган матбуот анжуманида қирғиз расмийлари коррупцияга қарши курашни кучайтиришдан манфаатдорлиги ва ҳуқуқ-тартибот идоралари “Озодлик” томонидан ўтказилган журналистик суриштирув натижалари бўйича фактларни ўрганишга киришганлигини маълум қилган.