Сергели туманининг номини ўзгартириш тўғрисидаги Халқ депутатлари Тошкент шаҳар Кенгаши депутатлигига 50-Минор сайлов округига Ўзбекситон “Адолат” социал-демократик партиясидан номзод Рустам Умаровнинг таклифи ижтимоий тармоқларда кенг муҳокама қилинмоқда.
Мазкур фикр юзасидан номзод тумани номини ўзгартириш унинг шахсий фикри эканлигини маълум қилди.
“Депутатликка номзодлар, умуман Ўзбекистон Республикасининг ҳар бир фуқароси Конституциямизга кўра ўз фикри, қарашларини эркин билдириш ҳуқуқига эгадир.
Шу боисдан бу менинг шахсий фикрим эканлигини эътиборга олишингизни ҳамда буни Ўзбекистон “Адолат” социал-демократик партиясининг позицияси сифатида талқин қилмаслигингизни сўрайман.
“Адолат” СДПнинг сайловолди дастури ва ўз олдига қўйган мақсадларида мамлакатимиз ҳудудларининг, жумладан, Сергели туманининг номини ўзгартириш кўзда тутилмаган”, — дейди номзод.
Аввалроқ Сергели туманининг асл номи руслашиб кетгани боис депутатликка номзод Рустам Умаров уни ўзгартириш таклифи билан чиққани ҳақида хабар бергандик.
