2019 йилнинг 28 ноябрь куни соат 05:59 да Сирдарё вилояти Гулистон шаҳри “Намуна” маҳалласи Бунёдкор кўчасида жойлашган “Якка тартибдаги тадбиркор Б.Жумабоев”га тегишли автомобилларга техник хизмат кўрсатиш устахонасида ёнғин бўлаётганлиги ҳақида ёнғин-қутқарув хизматига хабар келиб тушган.
Воқеа жойига 2 та ёнғин ўчириш бўлинмалари жалб этилган. Бўлинмалар кўрсатилган манзилга 3 дақиқада етиб борган ва ёнғин соат 06:07да ўраб олиниб, соат 06:34да тўлиқ бартараф этилган. Ёнғин ўчирувчиларнинг тезкор ҳаракатлари натижасида ёнғиндан устахона биносининг 100 кв.метр майдони сақлаб қолинган ва қўшни биноларга аланга ўтиб кетиши олди олинган.
Ҳалок бўлган ва тан жароҳати олганлар йўқ. Ёнғин оқибатида устахонанинг ички қисми 30 кв.м майдонда ва ичида бўлган таъмирлашга олиб келинган 3 та енгил автомобиллар: фуқаро Ш.Ю.га тегишли “Лассети” русумли, фуқаро Х.М.га тегишли ВАЗ 21-011 русумли, ҳамда фуқаро О.Б.га тегишли ВАЗ 2106 русумли автомобиллари тўлиқ ёнган.
Ёнғин сабаби ва моддий зарар миқдори аниқланмоқда.
