2019 йил 4 декабрь куни Андижон вилояти, Булоқбоши тумани, Учтепа қишлоғида жойлашган “Учтепа нефт ва газ кони”нинг 12-сонли газ қудуғи ишга қўшилди ва саноат миқёсида газ олинди. Бу ҳақда "Ўзбекнефтгаз" АЖ матбуот хизмати хабар бермоқда.
Хабарга кўра, мазкур қудуқдан газ қазиб олиш ҳажми кунлик 50-60 минг/м3 ташкил этади.
Айни пайтда ушбу газ қудуғининг ишга туширилиши бўйича газ қувурларини ётқизиш ишлари якунланди.
Бунинг натижасида Андижон вилояти Булоқбоши туманининг яна қўшимча 5 мингта хонадони табиий газ билан таъминланади.
Маълумки, ўтган икки йил давомида "Андижоннефть" АЖ томонидан “Учтепа нефт ва газ кони”ни ўзлаштириш ва ишга тушириш учун жами 9 та нефт ва газ қудуқлари бурғуланди. Мазкур бурғулаш ишлари натижасида қудуқлардан табиий газ олиниб, Булоқбоши туманининг 20 мингдан ортиқ аҳолиси газ билан таъминланишига эришилган.
