Қарши шаҳрида бино-иншооти бузилиб, ер участкаси олиб қўйилган ва компенсация пули тўланмай қолган жисмоний ва юридик шахслар олдидаги қарздорлик яқин вақтдан бошлаб давлат бюджетидан тўлаб берилмоқда. Бу ҳақда Қарши шаҳар ҳокимлиги Ахборот хизмати маълум қилди
Хусусан, ҳозирга қадар 20 дан ортиқ бузилган нотурар жой учун тадбиркорларга 1 миллиард 654 миллион сўм миқдоридаги, 6 та турар жой учун аҳолига 396 миллион сўм атрофидаги компенсация пуллари тўлаб берилди.
Мисол учун, Қарши шаҳрида яшовчи М.Раҳимовага тегишли уй-жой 2016 йилда бузиб олинган ва моддий зарарни қоплаш жараёни турли сабабларга кўра кечиккан. Кўрилган чора-тадбирлар натижасида ушбу фуқаро ҳисобига тегишли компенсация пули ўтказиб берилди.
Шунингдек, “Саноат озиқ-овқат ва қурилиш материаллари таъминоти” корхонасига қарашли бўлган, анча илгари давлат ва жамият эҳтиёжи учун олиб қўйилган нотурар бино-иншоот 1 миллиард сўмдан кўпроққа баҳоланган. Аниқ молиялаш манбаси йўқлиги сабабли шу пайтгача мулк эгаси компенсация пулини ололмаган. Мазкур зарар миқдорининг қарийб ярми тадбиркорга қоплаб берилди.
Ҳали бу борада ишлар давом эттирилмоқда.
