19 декабрь куни Россия Президенти Владимир Путин йиллик матбуот анжуманида қатнашиб, журналистларнинг саволларига жавоб берди. Бу ҳақда таржимон.уз хабар бермоқда.
Россиянинг Британия сиёсатига аралашгани ҳақидаги саволга жавоб берар экан, Путин:
«Россиянинг Британия ишларига аралашгани ёки аралашмагани тўғрисида гапирадиган бўлсак, биз турли мамлакатлардаги расмий бошқарув органларидан, шу жумладан Британиядан ҳам, Россияда содир бўлаётган воқеаларни баҳолаш тўғрисидаги фикрларни кўп эшитганмиз. Бу ўзга мамлакат ишларига аралашувми? Агар сиз бу аралашув деб ўйласангиз, унда шундай деб ўйлашда давом этинг. Аммо бу ҳолатнинг бошқа давлат ишларига аралашишга умуман алоқаси йўқ” дея бу айбловларни рад этди.
Шунингдек, Путин Буюк Британия Бош Вазири Борис Жонсонни бошқа амалдорлардан кўра Британия жамиятининг Брексит бўйича ҳолатини яхшироқ англашини мақтаб, у ҳақда бир қанча илиқ фикрлар билдириб ўтди.
«Ҳозир Британиянда бўлаётган ишларга келсак, Жонсонни табриклаш мумкин. У, бу ойда бўлиб ўтган сайловда ғолиб чиқди ва Британия жамиятидаги кайфиятни рақибларидан кўра яхшироқ тушунди. У Брексит бўйича ўзининг барча режаларини амалга ошириш ниятида», деди Путин.
Лондон ва Москва ўртасидаги муносабатлар 2018 йилдан бери таранглигича қолмоқда. Ўшанда бу мамлакатлар ўртасидаги келишмовчиликка Англияда собиқ рус айғоқчиси ва унинг қизининг заҳарланиши сабаб бўлганди.
