Халқ таълими вазири буйруғи билан 2020 йилнинг учинчи чорагидан бошлаб, 10-11-синфларда фанлар ихтиёрий танлов асосида ўқитилади. Мазкур тажриба-синов ўқув йили якунига қадар ўтказилади. Бу ҳақда халқ таълими вазирлиги ахборот берди.
Хабарда айтилишича, 2020 йилнинг январидан бошлаб, 10-11-синфларда фанлар ихтиёрий танлов асосида ўқитила бошлайди. Мазкур тажриба-синов ўқув йили якунига қадар ўтказилади.
Шунингдек, ўқув йилининг учинчи чорагидан бошлаб, умумий ўрта таълим мактабларида вариатив (ўзгарувчан) ўқув режалари ҳам тажриба-синовдан ўтказилади. Танлов синфида ўқиш учун хорижий тил ва филология йўналиши, молия – иқтисод, технология, табиий фанлар ҳамда ижтимоий-гуманитар йўналишлари тавсия этилади. Вариатив ўқув режаларининг жорий этилиши натижасида 10- ва 11-синфларда ўқиладиган мажбурий фанлар сони 15 тадан 8 тага камаяди.
Ўқув режасини тажриба-синовдан ўтказиш жараёнида она тили ва адабиёт, ўзбек ва рус тили, чет тили, тарих, математика, информатика, маънавият асослари (тарбиявий дарс) ҳамда жисмоний тарбия фанлари мажбурий ўқитилади.
Янги тизим орқали ўқувчилар мактабнинг ўзида олий таълим муассасасига кириш имтиҳонига тайёрланишади.
Мазкур тизим ўқувчиларнинг репетиторга бўлган эҳтиёжини камайтириб, вақти ҳамда ота-оналарнинг маблағларини тежашга ёрдам беради. Кам таъминланган оила фарзандлари учун ҳам OTMга бепул тайёргарлик кўриш имкони яратилади.
