Пойтахтимизда давом этаётган халқаро анжуманда сўзга чиқаётган маърузачилар жамоатчилик назорати, депутатлар фаолиятига алоҳида тўхталиб ўтишмоқда.
Русланбек Давлетов, Ўзбекистон адлия вазири:
Бугун айнан жамоатчилик назоратининг танқидлари натижасида кўплаб ижобий ўзгаришлар юз беряпти. Қайсидир давлат органига жамоатчилик назорати кучайгани таъсир қилмаётган бўлиши мумкин, лекин кўплаб давлат органи, ижро ҳокимияти учун жуда катта «сигнал» беряпти. Парламент ўзгарганини кўп таъкидлаяпмиз. Бироқ тан олиш керак, бу вилоятларда, чекка ҳудудларда сезилмаяпти. Депутатларимизда шижоат биз кутгандек бўлмаяпти».
Маълум қилинишича, вазирлик томонидан депутатлар учун қўлланма ишлаб чиқилди.
«Адлия вазирлиги депутатлар билан ишлаш, уларга кўмак бериш мақсадида махсус қўлланма ишлаб чиқди. Унда депутатлар қандай қилиб ўз ишини ташкиллаштириши кераклиги бўйича тавсиялар бор», - деди вазир.
Қайд этамиз, мазкур анжуманда халқаро экспертлар ҳам иштирок этмоқда. Улар орасида БМТнинг Ўзбекистондаги доимий вакили Хелена Фрейзер, БМТ Тараққиёт дастурининг Ўзбекистондаги доимий вакили Матилда Димовска, К.Аденауэр фондининг Марказий Осиё бўйича Минтақавий ваколатли вакили Ронни Хайне, ЕИҲТ лойиҳаларининг Ўзбекистондаги координатори Жон МакГрегор ва бошқалар бор.
