2020-йил 28-феврал куни соат 14:20 ларда Миллий гвардия Сурхондарё вилояти Қўриқлаш бошқармаси томонидан қўриқланаётган Сурхондарё вилояти Жаркўрғон тумани “Нурли-диёр” маҳалласи ҳудудидан оқиб ўтувчи (М-41 “Бишкек-Душанбе-Термиз” автомобил йўлининг 1585 км.даги) Сурхон дарёси кўпригида хизмат олиб бораётган ходимларнинг тезкор ҳаракати туфайли ўзини сувга ташлаб, ўз жонига қасд қилмоқчи бўлган фуқаро қутқариб қолинди. Бу ҳақда Миллий гвардия Ахборот хизмати маълум қилди.
Маълум бўлишича, ушбу кўприк орқали Жарқўрғон туманининг маркази томонига ҳаракатланиб келаётган нотаниш шахс бирдан тўхтаб қолганлигини кўрган Қўриқлаш хизмати ходимлари тезда унинг ёнига етиб бориб, кўприк устида тўхтаб туриш мумкин эмаслигини тушунтиришган. Шундан сўнг ҳаракатни давом эттирган фуқаро ходимлардан чамаси 15-20 метр узоқлашгач, бирдан ўзини сувга ташлаган. Орқасидан кузатиб келаётган ходимлардан бири бўлган С.Қодиров дарҳол ўзига бириктирилган махсус анжом ва воситаларни шеригига қолдириб, ўзини сувга ташлаган ва фуқарони ушлаб дарёнинг қирғоғига олиб чиққан. Қўриқлаш хизмати ходими томонидан ёрдамга етиб келган сафдошлари билан биргаликда унга биринчи тиббий ёрдам кўрсатилган.
Жараён давомида хабар берилган ва етиб келган тезкор гуруҳ ушбу фуқарони Жарқўрғон тумани тиббиёт бирлашмаси Шошилинч тиббий ёрдам бўлимига етказган.
Ҳолат юзасидан олиб борилган суриштирув ишлари натижасида суиқасд содир этган фуқаро Сурхондарё вилояти Музработ туманида яшовчи 2001-йилда туғилган фуқаро Ў.Е. эканлиги аниқланган. Хозирда суруштирув ишлари давом этмоқда.
