Сингапур ҳукумати коронавирус туфайли жорий қилинган карантин тартибларини бузгани учун мамлакат фуқаросининг паспортини бекор қилди, дейилади мамлакат иммиграция ва назорат бўйича муассаса сайтида тарқатилган хабарда.
Иммиграция ва назорат муассасаси (ICA) 53 ёшли Го Ильи Викторнинг паспортини уйда бўлиш билан боғлиқ талабни бузгани учун бекор қилган.
Айни пайтда, ушбу иш бўйича соғлиқни сақлаш вазирлиги текширув ўтказмоқда.
Жорий қилинган карантин тартибига кўра, сўнгги 14 кун давомида Жанубий Осиё мамлакатларида бўлиб қайтган сингапурликларнинг барчаси икки ҳафта уйда ўтириши лозим. Хабарда айтилишича, 3 март куни Го Сингапурдан Индонезияга кетган, 19 март куни эса Сингапурга қайтган. Лекин 14 кун карантинда ўтириш ўрнига Сингапурга келган куниёқ яна Индонезияга жўнашга қарор қилган. У ҳукуматнинг карантин режимини бузгани ҳақидаги огоҳлантиришини назар-писанд қилмай, 24 март куни яна Сингапурга келишга уринган. Бироқ карантин шартларини атайлаб бузгани учун, унинг паспорти бекор қилинди.
“ICA карантин тартибига амал қилмаганларга жуда қаттиқ чора кўради“, — дейилади хабарда.
Сингапурда карантинга амал қилмаганларга 10 минг доллар миқдорида жарима солинади ёки олти ойгача қамоқ жазоси белгиланган.
