Аввалроқ, 2020 йил 20 январь куни соат 14:20 ларда Самарқандда ижро ҳаракатларини амалга ошираётган МИБ ходимларига қаршилик қилган аёл уларни ёқиб юборгани ҳақида хабар берилган эди. Шундан сўнг, МИБ ушбу ҳолатга батафсил ойдинлик ҳам киритган.
Айни пайтда Олий суд Матбуот хизматининг маълум қилишича, ASIA TERRA сайтида 2020 йил 18 апрель куни “ЖИТЕЛЬНИЦА САМАРКАНДА, ОБВИНЕННАЯ В ПОПЫТКЕ ПОДЖОГА ГОССЛУЖАЩИХ, УЖЕ ТРИ МЕСЯЦА НАХОДИТСЯ В СИЗО” сарлавҳали мақола эълон қилинган. Унда 41 ёшли аёлни 3 ойдан буён тергов изоляторида ноҳақ ушлаб турилгани айтилган.
Мазкур мақоладаги ҳолатга Олий суд томонидан расмий тушунтириш берилди.
Келтирилишича, 2020 йил 20 январь куни Мажбурий ижро бюроси Самарқанд шаҳар бўлими давлат ижрочиси М. Бекмуҳаммедов, бўлим бошлиғи ўринбосари Ф. Ибрагимов ва жами 23 нафар давлат ижрочилари билан биргаликда иш юритувидаги фуқаролик ишлари бўйича Самарқанд шаҳар судининг 2019 йил 12 сентябрдаги ижро ҳужжатига асосан уй-жойдан чиқариш юзасидан Самарқанд шаҳри Навоий-шох кўчаси 49-уй 16-хонадонда мажбурий ижро ҳаракатларини бошлаш жараёнида, фуқаро Дилором Розиқова уй-жойдан чиқишдан қатъий бош тортиб, МИБ Самарқанд шаҳар бўлими ходимларининг хизмат фаолиятига фаол қаршилик кўрсатади. Ҳатто, уларнинг устига бензин ёқилғисини сепиб, қўлида ёниб турган сочиқни уларни устига қасддан улоқтириб юбориб, давлат ижрочиларини хизмат вазифаларини бажаришдан воз кечишига мажбур қилган.
Шунга кўра, Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) 2-қисми билан айбланган Д. Розиқова (1978 йилда Самарқанд шаҳрида туғилган, ўзбек, оилали, 1 нафар фарзанди бор, вақтинча ишсиз, муқаддам судланган, 2020 йил 23 январдан унга нисбатан қамоқ эҳтиёт чораси қўлланилган)га нисбатан юритилган жиноят иши жиноят ишлари бўйича Самарқанд шаҳар судининг иш юритувида бўлган. Бироқ, Ўзбекистон Республикаси Олий суди Раёсатининг 2020 йил 20 мартдаги “Ўзбекистон Республикаси судларида COVID-19 коронавирус инфекцияси тарқалишининг олдини олиш тўғрисида”ги қарорига мувофиқ мамлакатимиз судларида фуқароларнинг шахсий қабули, суд жараёнлари ва сайёр суд мажлислари вақтинча тўхтатилганлиги сабабли ушбу жиноят ишини кўриш номаълум муддатга қолдирилган.
Ўзбекистон Республикаси Олий суди матбуот хизмати
