Bugun o`zbek futbolini tom ma`noda jahon arenasiga olib chiqqan, o`z vaqtida jahon va 5 karra Osiyoning eng yaxshi hakami deya e`tirof etilgan – Ravshan Ermatov 43 yoshni qarshi olmoqda.
Ravshan Ermatov – bu nom 2010-yili JARda o`tkazilgan Jahon chempionatining ochilish uchrashuviga qadar dunyo futboli uchun notanish edi. Ammo, Ermatov o`sha yilning 11-iyun kuni mezbon JAR va Meksika futbolchilari o`rtasidagi mundialning ilk o`yinini boshqarishi bilan futbol oilasidagilarning e`tirofiga va muxlislarning tiliga tushdi.
Uchrashuv davomida o`zbek o`g`loni juda nozik vaziyatlarda to`g`ri qaror chiqarib, FIFAdagilar ishonchini qozona oldi. Shundan so`ng Ermatovga JCh-2010da yana 4ta muhim uchrashuv ishonib topshirildi. Bu bilan hamyurtimiz o`ziga xos rekord sohibiga aylandi – bir jahon chempionatida eng ko`p o`yin boshqargan kam sonli hakamlar safiga kirdi.
Ravshan Sayfiddinovich Ermatov 1977-yilning 9-avgustida Toshkent shahrida tavallud topdi. Uning otasi Sayfiddin Ermatov bolalar murabbiyi va futbol hakami sifatida o`z nomiga ega inson.
Ravshan Ermatov futbolchi bo`lish orzusida shug`ullandi, ammo 17 yoshligida olgan og`ir jarohat tufayli futbolchilik faoliyatini juda erta yakunlashiga to`g`ri keldi. Shundan so`ng, bolalar futbolida otasiga yordamchilik qila boshladi. Shunday kunlarning birida tasodifan navbatdagi uchrashuvga kela olmay qolgan hakam o`rnida ishlab, hakamlikka qadam qo`ydi.
Asta-sekin futbol uchrashuvlarini boshqarib, bora-bora Oliy liga darajasiga ko`tarildi. 2003-yildan e`tiboran uning xalqaro faoliyati boshlandi.
U 2014-yili Braziliyada o`tkazilgan mundialda 4 ta, 2018-yili Rossiyada o`tkazilgan mundialda 2 ta uchrashuvni boshqarib, jami 11 ta o`yinda ishlagan yagona hakam sifatida “Ginnes rekordlari kitobi”dan joy oldi.
Ravshan Ermatov 2011-yilda Xalqaro futbol tarixi va statistikasi uyushmasi tomonidan “Jahonning eng yaxshi hakami” deya e`tirof etilgan. 2012-yilda esa, jahonga mashhur futbol bo`yicha Worldreferee.com sayti tomonidan ham eng yaxshi hakam nomiga loyiq ko`rilgan. 2015-yilda har yili Dubayda o`tkaziladiganGlobe Soccer Awards yilning eng yaxshilarini taqdirlash marosimida yana bir bor “Jahonning eng yaxshi hakami” nomiga sazovor boʻldi.
Ravshan Ermatovning bu kabi yutuqlari davlatimiz rahbariyati tomonidan ham e`tirof etilib, “O`zbekiston iftixori” faxriy unvoni, “El-yurt hurmati”, “Buyuk xizmatlari uchun” ordenlari bilan taqdirlandi.
2019-yilda Ravshan Ermatov O`zbekiston futbol assosiasiyasi birinchi vise-prezidentligiga saylandi. Shu bilan uning O`zbekistonda futbolni yangi bosqichga olib chiqishdagi faoliyati boshlandi.
Hukumatimiz tomonidan Ravshan Ermatovga katta ishonch bildirilib, 2020-yilda O`zbekiston Respublikasi Jismoniy tarbiya va sport vazirining birinchi o`rinbosari lavozimiga tayinlandi.
Fursatdan foydalanib, Ravshan Ermatovni bugungi tavallud ayyomi bilan samimiy muborakbod etamiz.
