Ijtimoiy tarmoqlarda Koka-kola yuk mashinasi ag`darilib ketgani aks etgan video lavha tarqaldi. Bu video yuzasidan O`zbekiston Respublikasi IIV YHXBB Axborot xizmati rasmiy munosabat bildirdi.
Joriy yilning 26 avgust kuni soat 07:00 larda, Sirdaryo viloyati, Mirzaobod tumani hududidan o`tgan A-373 avtomobil yo`lining 17-kilometrida haydovchi, 1962 yilda tug`ilgan K.M. “Mersedes-bens” rusumli yuk avtomobilini “Toshkent–Termiz” yo`nalishida boshqarib ketayotib, yo`lning ushbu qismida yomg`ir yog`ayotganligi sababli rul boshqaruvini yo`qotib, yo`l chetiga ag`darilgan.
Natijada, xaydovchi K.M. tan jarohatlari olib shifoxonaga yotqizilgan.
Mazkur holat yuzasidan Mirzaobod tumani IIB YHXB tomonidan surishtiruv ishlari olib borilmoqda.
Barcha haydovchilardan ob-havo sharoitini inobatga olgan holda yo`llarda ehtiyotkorlik bilan harakatlanishlarini so`rab qolamiz, deyiladi IIV YHXBB matbuot xizmati xabarida.
