Hozirda dunyodagi eng katta muammo bo`lib turgan koronavirus pandemiyasi ilk bor Xitoyning Uxan shahrida paydo bo`lganidan xabaringiz bor, albatta. Uxan rasmiylarining xabar berishicha, shaharda 1 sentyabr seshanba kunidan boshlab barcha bolalar bog`chalari va maktablar ochiladi. Bu haqda tarjumon yozmoqda.
Seshanbadan kuzgi o`quv muddati boshlanar ekan Uxandagi 2842 ta ta`lim muassasasi shahardagi 1.4 million nafar o`quvchilarga o`zlarining eshiklarini ochishni rejalashtirishmoqda, deya xabar berdi Uxan hokimiyati juma kuni. Uxan universiteti esa 24 avgustdayoq o`z faoliyatini boshlagan.
Shahar ma`muriyati agar koronavirus xavfi tug`ilgudek bo`lsa, onlayn ta`lim berish uchun favqulodda rejalar ham tayyorlanib qo`yilganini aytgan. O`quvchilarga maktabga borish va kelishda yuz niqoblaridan foydalanish, imkon bo`lsa jamoat transportiga chiqmaslik tavsiya etildi.
Maktablarga kasallikni nazorat qiladigan jihozlarni shay holatga keltirish va o`quv mashg`ulotlarini boshlashdan oldin treyninglar olib borish vazifasi yuklandi. Shuningdek, maktablar o`quvchilarning sog`ligi haqidagi har kungi xabarlani sog`liqni saqlash idoralariga jo`natib turishlari kerak bo`ladi. O`zlarining ta`lim muassasalaridan chaqiruv xati olmagan talabalar va o`qituvchilarning shaharga qaytishlariga ruxsat berilmaydi.
Koronavirusning “vatani” bo`lgan Uxan yanvar oyining oxirida qat`iy karantin tufayli yopib qo`yilgan va bu holat ikki oydan ko`proq muddat davom etgandi. Uxanda koronavirusdan o`lganlar 3869 kishini tashkil qiladi va bu butun Xitoyda qayd etilgan o`lim hollarining 80 foizi demakdir.
Uxanda aprel oyida karantin bekor qilindi. Shundan keyin shahar normal hayotga qaytishni boshladi. Bu erda 18 maydan beri aholi orasida koronavirus bilan kasallanish hollari aniqlanmayapti.
