Maxsus poezd reysi orqali Samaradan mingga yaqin yurtdoshimiz olib kelindi. Bu haqda O`zbekiston Respublikasi Transport vazirligi Axborot xizmati ma`lum qildi.
Respublika maxsus komissiyasi O`zbekiston fuqarolarini Rossiya Federasiyasining Samara viloyatidan olib kelish uchun “Toshkent – Kinel –Toshkent” temir yo`l reysini tashkil etish to`g`risida qaror qabul qilgan edi.
Rossiya va Qozog`iston tomoni bilan kelishuvga binoan, joriy yilning 31 avgust kuni “O`zbekiston temir yo`llari” AJ poezdi 922 nafar yurtdoshlarimiz bilan “Kinel” stansiyasidan O`zbekistonga jo`nagan edi.
Mazkur poezd 2 sentyabr kuni Samarqand shahriga etib keldi. Ushbu reys orqali olib kelingan barcha fuqarolar avtobuslarda viloyatdagi karantin zonalariga etkazildi.
