YPX inspektorlariga bo`ysunmay o`zi va o`zgalar hayotiga xavf solib transport vositasini boshqargan haydovchi 6 sutkaga qamaldi Bu haqda Samarqand viloyati IIB axborot xizmati xabar berdi.
Voqea 2020 yilning 3 sentyabrida soat taxminan 23:45 larda sodir bo`lgan. Samarqand shahar “Qo`shhovuz” ko`chasida yashovchi, 2001 yilda tug`ilgan N.Toshpo`latov Samarqand shahar “M.Ulug`bek” ko`chasi bo`ylab o`ziga tegishli Neksiya-2 rusumli avtomashinani boshqarib kelayotgan vaqtida Samarqand viloyati IIB YHXB inspektori tomonidan unga to`xtash ishorasi berilgan.
Haydovchi YPX inspektorining qonuniy talablariga bo`ysunmay, harakatni davom ettiradi.
Shubhali bo`lgan ushbu transport vositasiga Samarqand shahar “Beruniy” va “M.Ulug`bek” ko`chalari chorraxasida xizmat o`tayotgan YPX inspektori tomonidan ham to`xtash ishorasi berilishiga qaramasdan, haydovchi yana YPX inspektorlarining talabini bajarmasdan keskin harakatlanishda davom etadi.
Haydovchining shaxsiga tezkorlik bilan aniqlik kiritildi va qo`lga olindi.
Uning harakatlarida O`zbekiston Respublikasi MJtKning 183, 194, 195-moddalarida ko`rsatilgan huquqbuzarlik alomatlari mavjudligini inobatga olib, belgilangan tartibda ma`muriy bayonnomalar rasmiylashtirildi va to`plangan hujjatlar ko`rib chiqish uchun Samarqand shahar Ma`muriy ishlar bo`yicha sudiga yuborildi.
Samarqand shahar Ma`muriy ishlar bo`yicha sudi tomonidan huquqbuzarga nisbatan olti sutka ma`muriy tartibda qamoq jazosi tayinlandi.
