Sirdaryo viloyati hokimligi katta majlislar zalida viloyat hokimi G`ofurjon Mirzaev raisligida faollar yig`ilishi bo`lib o`tdi. Yig`ilishda viloyat hokimining sanoatni rivojlantirish, kapital qurilish, kommunikasiyalar va kommunal xo`jalik masalalari bo`yicha o`rinbosari lavozimiga yangi tayinlov amalga oshirildi. Bu haqda Sirdaryo viloyati hokimligi Axborot xizmati xabar berdi.
Shu kunga qadar Shirin shahar hokimi lavozimida ishlab kelgan Xojimatov Abdug`affor Tillaboevich viloyat hokimining sanoatni rivojlantirish, kapital qurilish, kommunikasiyalar va kommunal xo`jalik masalalari bo`yicha o`rinbosari etib tayinlandi.
Xojimatov Abdug`affor Tillaboevich 1967 yil 31 avgustda Namangan viloyati Uychi tumanida tug`ilgan. 1994 yilda Namangan muhandislik-texnologiya institutini tamomlagan.
Mehnat faoliyati davomida Namangan muhandislik-texnologiya instituti muhandisi, Sirdaryo viloyati “Sirdaryo gaz ta`minoti” boshqarmasi etakchi muhandisi, Sirdaryo viloyati “Guliston gaz taminoti” korxonasi bosh muhandisi, O`zbekiston Respublikasi Vazirlar Mahkamasi huzuridagi “O`zneftgazinspeksiyasi” Sirdaryo viloyati bo`limi 1-toifali muhandis-texnologi, etakchi muhandis-texnologi, bosh texnologi, “Markazgazta`minot” unitar korxonasi Sirdaryo viloyati gaz ta`minoti boshqarmasi boshlig`i, Sirdaryo viloyati hokimligi sanoatni rivojlantirish, kapital qurilish, kommunikasiyalar va kommunal xo`jalik masalalari kotibiyati mudiri lavozimida faoliyat yuritgan.
Sirdaryo viloyati hokimi G`ofurjon Mirzaevga maslahatchi tayinlandi.
Isaqulov Shohrux Norqulovich – viloyat hokimining turizm va sportni rivojlantirish masalalari bo`yicha maslahatchisi lavozimiga munosib ko`rildi.
Tayinlovga qadar Sirdaryo viloyati Investisiyalar va tashqi savdo boshqarmasi boshlig`i o`rinbosari lavozimida faoliyat ko`rsatgan.
Shohrux Isaqulov 1991 yil 1 martda Guliston shahrida tug`ilgan. 2011 yil Amerika Qo`shma Shtatlari Kanzas Shtati “Nyuman" universiteti (Newman University), 2014 yil Amerika Qo`shma Shtatlari Kanzas Shtati "Frends" universiteti (Friends University)ni tamomlagan.
Mehnat faoliyati davomida Amerika Qo`shma Shtatlarida joylashgan turli nufuzli kompaniyalarda ma`sul lavozimlarda ishlagan.
Xususan, Amerika Qo`shma Shtatlari Illinoys Shtati “Prays Voterxaus Kupers soliq, audit va konsalting kompaniyasi” (PricewaterhouseCoopers, Audit and Assurance, Consulting and Tax services) audit va konsalting bo`limining bosh auditori va konsultant-maslahatchisi, Amerika Qo`shma Shtatlari Illinoys Shtati “KPMJ soliq, audit va konsalting kompaniyasi” (KPMG Tax, Auditing, and Consulting Company) audit va konsultantlik bo`limining bosh auditori va konsultant-maslahatchisi lavozimida samarali mehnat qilgan.
