Shimoli-g`arbiy harbiy okrug qo`shinlari qo`mondonligining tashabbusi bilan Nukus garnizonidagi 1-sonli yopiq harbiy shaharchada faoliyat yuritayotgan “Vatanparvar” mahalla fuqarolar yig`inida harbiy xizmatchilar va ularning oila a`zolariga psixologik xizmat ko`rsatish tizimi joriy etildi. Bu haqda Shimoli-g`arbiy harbiy okrug matbuot xizmati xabar berdi.
Ta`kidlanishicha, mazkur tizim Mudofaa vazirligining harbiy mahallalari o`rtasida birinchi bo`lib Nukusda faoliyatini boshlagan. Harbiy okrugning malakali psixologi va sosiologi, shuningdek, Nukus shahar oilaviy psixologik markazi va voyaga etmaganlarga psixologik yordam berish markazining tajribali mutaxassislarini jalb etgan holda mahallada istiqomat qilayotgan harbiylarning oila a`zolariga ruhiy va emosional ko`mak berilgan. Bu orqali farzand tarbiyasi, ayniqsa balog`at yoshidagilar va o`smirlarning xulq-atvorida ro`y berayotgan o`zgarishlarda, nafaqaga chiqqan harbiy xizmatchilarning ijtimoiylashuv jarayonlarining oson kechishini ta`minlaydi.
Psixologik xizmat ko`rsatish haftaning seshanba va payshanba kunlari soat 10.00-17.00 da amalga oshiriladi. Maslahatni olish uchun kelgan mahalla aholisiga qo`shimcha qulaylik yaratish maqsadida respondentlarni qayd etish yoki boshqa bir hujjatlarda rasmiylashtirish qat`iy ravishda olib borilmaydi, shuningdek, suhbat jarayonlarining yopiqligi hamda oshkor bo`lmasligi ta`minlanadi. Mahalla ahli uchun psixologik ko`mak berayotgan mutaxassislarning telefon orqali anonim maslahat berish tizimi ham joriy etilgan.
Mahallada psixologik xizmat ko`rsatish tizimini rivojlantirish maqsadida harbiy xizmatchilarning oilalari o`rtasida turli seminar va trening mashqlari o`tkazilishi yo`lga qo`yilgan.
“Vatanparvar” mahalla fuqarolar yig`ini harbiy xizmatchilar oila a`zolarining xotirjamligini ta`minlash, farzandlariga haqiqiy g`amxo`r bo`lish kabi muhim vazifani bajarishda boshqa mahallalarga har tomonlama o`rnak bo`lmoqda. Yurtimizning eng olis garnizonida joylashgan ushbu harbiy mahalla 2020 yilda Mudofaa vazirligi harbiy mahallalari o`rtasida o`tkazilgan "Eng namunali harbiy mahalla fuqarolar yig`ini" ko`rik-tanlovida faxrli 1-o`rinni qo`lga kiritgan.
Harbiy shaharcha hududida joylashgan ushbu mahalla faoliyati 2018 yilda yo`lga qo`yilgan bo`lib, undagi jami 19 ta qo`p qavatli uylarda 500 ga yaqin harbiy xizmatchilar hamda harbiy pensionerlar istiqomat qilishadi. Mahalla hududida bittadan umumta`lim maktabi hamda maktabgacha ta`lim muassasasi joylashgan. Mustaqilligimizning 29 yillik bayrami arafasida ushbu mahallada katta bunyodkorlik ishlari amalga oshirilib, harbiy xizmatchilar uchun ikkita ko`p qavatli yangi uylar qurilib, uzoq muddatli imtiyozli ipoteka krediti asosida foydalanishga topshirildi.
