Navoiy viloyati Nurota tumani aholisi va tumanda joylashgan «Chashma» ziyoratgohiga tashrif buyuruvchilar uchun qo`shimcha qulayliklar yaratish maqsadida Transport vazirligi qoshidagi “Uzautotrans service” MChJ tomonidan Toshkent – Nurota yo`nalishida muntazam avtobus qatnovlari yo`lga qo`yilmoqda. Bu haqda Transport vazirligi xabar berdi.
Mazkur yo`nalishda qatnovlar joriy yilning 15 sentyabr kunidan boshlanadi. Toshkent – Nurota yo`nalishidagi avtobus soat 11:00 da “Toshkent” avtovokzalidan harakatlanishni boshlaydi. Nurota avtovokzalidan esa avtobus soat 6:30 da Toshkent shahri tomon yo`lga chiqadi.
Ushbu yo`nalish chipta narxi 60 000 so`m etib belgilangan. Chiptalarni "Toshkent" avtovokzali kassalaridan, shuningdek, Uztrans.uz yagona interaktiv axborot portali va avtoticket.uz sayti orqali onlayn tarzda sotib olish mumkinligi aytilmoqda.
Qo`shimcha ma`lumotlarni (71) 207-87-00 telefon raqamidan bilib olishingiz mumkin.
