20 yoshli haydovchi "Vaz 2107"da urib yuborgan qizaloq shifoxonada vafot etdi. Bu haqida O`zbekiston Respublikasi IIV YHXBB Axborot xizmati xabar bermokda.
Joriy yilning 14 sentyabr kuni soat 11:00 larda, Namangan viloyati, Kosonsoy tumani hududidan o`tgan 4R 114 avtomobil yo`lining 16-kilometrida, haydovchi, 2000 yilda tug`ilgan A.Q. “Vaz 2107” rusumli avtomobilni boshqarib ketayotib, yo`lga yugurib chiqqan piyoda, 2011 yilda tug`ilgan M.O.ni urib yuborib, YTH sodir etgan.
Natijada, voyaga etmagan, 9 yoshli M.O. og`ir tan jarohatlari olib shifoxonada vafot etgan.
Mazkur YTH yuzasidan Kosonsoy tumani IIB huzuridagi TB tomonidan O`zbekiston Respublikasi Jinoyat Kodeksining 266-moddasi 2-qismi (odam o`limiga olib kelgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo`zg`atilib, hozirda tergov harakatlari olib borilmoqda.
Barcha haydovchilardan yo`lda piyodalarga e`tiborli bo`lishlarini, ota-onalar voyaga etmagan farzandlariga avtomobil yo`li atrofida harakatlanishga ruxsat bermasliklarini, doimo nazorat qilishlarini so`rab qolamiz.
O`zbekiston Respublikasi IIV YHXBB Axborot xizmati
