O`zini izolyasiyalash nima? O`g`lim Malayziyadan qaytyapti, uyda izolyasiyani qanday tartibda o`tashi kerak?
Ushbu savolga AOKAda o`tkazilgan brifingda Respublika bosh sanitariya inspektori, Koronavirusga qarshi kurash shtabi a`zosi Nurmat Otabekov, quyidagicha javob berdi:
O`z-o`zini izolyasiyalash - aholi uchun cheklovchi chora-tadbirlar majmui bo`lib, hukumat tomonidan xavfli kasalliklar tarqalishini oldini olish uchun muayyan muddatga joriy etiladi.
Izolyasiya vaqtida fuqarolar quyidagi rejimga rioya etishlari talab etiladi:
- o`ta zaruratsiz ko`chaga chiqmaslik;
- boshqa odamlar bilan muloqotni cheklash;
- yuqumli kasalliklar, xususan, koronavirusni oldini olish bo`yicha barcha tavsiyalarga rioya qilish.
Respublika maxsus komissiyasining 43-son bayonnomasiga ko`ra Malayziya koronavirus infeksiyasiga qarshi kurash bo`yicha "yashil hudud"ga kiradi. "Yashil hudud"dan qaytgan yo`lovchilarga karantin choralari qo`llanilmaydi (kasallik alomatlari bo`lgan shaxslar bundan mustasno).
