IIV huzuridagi Tergov departamenti xabariga ko`ra, ular qora niqob taqqan, egniga Milliy gvardiya harbiy kiyimida, rezina tayoqcha va qo`l kishani, pnevmatik o`q otar qurol bilan qurollangan holatda bo`lgan. Shu ko`rinishda A.I.ning boshqaruvidagi Matiz rusumli avtomashinada Toshkent viloyati Toshkent tumani, Tutzor mahallasi, Nurmakor ko`chasiga kelgan.
Bu shaxslar Lacetti rusumli avtomashinada uyiga kelayotgan 47 yoshli U.R.ning yo`lini to`sib, unga zo`rlik ishlatib, qo`llarini orqa tarafga qayirgan holda kishanlab, bosqinchilik sodir etgan.
Ular fuqaro U.R.ni Lacetti rusumli avtomashina orqa o`rindig`iga o`tkazib, olib ketmoqchi bo`lgan vaqtida IIB xodimlari tomonidan qo`lga olingan va qo`l kishani, rezina tayoq, pnevmatik o`q otar qurol, “Milliy gvardiya” xizmat kiyimi va niqoblari ashyoviy dalil tariqasida rasmiylashtirib olingan.
Hodisa joyini ko`zdan kechirish jarayonida, Matiz rusumli avtomashina salonidan J.P., A.I. va B.A. tomonidan qonunga xilof ravishda qo`lga kiritilgan avtoraqamlar aniqlanib, ushbu davlat raqamlari tegishli tartibda rasmiylashtirib olingan.
Mazkur holat yuzasidan Toshkent tumani IIB huzuridagi Tergov bo`limi tomonidan fuqarolar J.P., A.I. va B.A.ga nisbatan Jinoyat kodeksining 227-modasi 1-qismi (hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast etkazish yoki ularni yashirish) va 164-moddasi 2-qismi “a,b” bandi (bosqinchilik) bilan jinoyat ishi qo`zg`atilgan.
Dastlabki tergov jarayonida yuqoridagi fuqarolar jinoyat ishida ayblanuvchi tariqasida ishda ishtirok etishga jalb qilingan hamda ularga nisbatan “qamoqqa olish” tarzidagi ehtiyot chorasi qo`llanilgan.
Hozirda tergov harakatlari davom ettirilmoqda, deyiladi ma`lumotda.