Ijtimoiy tarmoqlarda Sirdaryoning Yangier shahrida fuqaro kaltaklangani bilan bog`liq video tarqaldi.
IIV huzuridagi Tergov departamenti Sirdaryo viloyatining Yangier shahrida bir necha fuqaro qo`llaridagi jism bilan fuqaroni kaltaklagan holati aks etgan video bo`yicha rasmiy ma`lumot berdi.
Joriy yilning 10 noyabr kuni soat 13:00da 25 yoshli S.T., 26 yoshli Sh.M. va 19 yoshli B.R. bir oy muqaddam qo`shni tuman hududiga borishgan vaqtida mahalliy aholi vakillari bilan o`zaro gap tortishib qolganliklari sababli o`ch olish maqsadida, Yangier shahar “Shodlik” MFY hududida joylashgan kafega yo`l olishgan.
Qayd etilishicha, ular kafe ofisianti, 23 yoshli J.X. bilan o`rtalarida o`zaro oldindan bo`lib o`tgan kelishmovchilik negizida uni qo`llari bilan urib, oyoqlari bilan tepib, yog`och jismdan foydalanib, bezorilik harakatlarining oldini olish chorasini ko`rgan boshqa fuqarolarga qarshilik ko`rsatgan holda shafqatsizlarcha J.X.ning tanasi turli joylariga urib, tan jarohati etkazib, hodisa joyidan yashiringan.
Natijada, fuqaro J.X. o`ng qo`l kichik barmog`i yopiq sinishi, yuqori chap tomon ikkita tishlarining sinib tushishi, tanasining ko`plab shilingan jarohatlari bilan Sirdaryo viloyati ShTTYoMga murojaat qilgan.
Holat yuzasidan Yangier shahar IIB huzuridagi Tergov guruhi tomonidan Jinoyat kodeksining 277-moddasi 3-qismi “g” bandi bilan (bezorilik harakatlarining oldini olish chorasini ko`rgan boshqa fuqarolarga qarshilik ko`rsatib sodir etilgan bo`lsa) jinoyat ishi qo`zg`atilgan.
Fuqarolar S.T., Sh.M. va B.R. gumon qilinuvchi tariqasida jalb qilinib, prosessual tartibda ushlanganlar.
Hozirda jinoyat ishi yuzasidan tergov harakatlari davom ettirilmoqda, deyiladi ma`lumotda.
