Surxondaryodagi "To`polang" suv ombori qanday qurilgan?

 Surxondaryo viloyatining suv salohiyatida asosiy 10 ta daryoning suv resurslari muhim o`rin tutadi. Foydalaniladigan suv resurslarining umumiy hajmi yiliga 4270 mlrd. m3 ni tashkil qiladi. Bunda asosiy ko`rsatkichlar Amudaryo, Surxondaryo daryolari hamda To`polang suv omborlari hissasiga to`g`ri keladi. Bu haqda "Darakchi" muhbiri xabar bermoqda.

Viloyatda umumiy suv sig`imi 1155,8 mln. m3 ga yaqin bo`lib, 5 ta sun`iy suv ombori mavjud. “O`zbekgidroenergo” AJ tomonidan To`polang suv omborida olib borilgan qurilish ishlari o`z muddatida muvaffaqiyatli qurib bitkazildi. Shu o`rinda, suv ombori 500 mln. m3 sig`imdagi suvni to`plash imkoniyatiga ega. Suv ombori to`g`onining uzunligi 187 metrni tashkil etadi. Suv ombori qurilishi bosqichma-bosqich amalga oshirildi. Dastlab suv ombori 120 mln. m3 sig`imdagi suvga mo`ljallanib, 1982 yilda qurilish ishlari boshlab yuborildi, 2006 yilga kelib, ushbu ko`rsatkich 380 mln. m3 ga etkazildi.  

O`zbekiston Respublikasi Prezidentining 2017 yil 4 maydagi 2952-sonli Qaroriga muvofiq, suv ombori hajmi 500 mln. m3 ga etkazildi. Shu o`rinda To`polang suv omborining yakuniy qurilishi 2019 yilda muvaffaqiyatli yakunlandi. Prezident topshirig`iga muvofiq, avvaliga To`polang suv ombori to`g`oni balandligi 20 metrga ko`tarildi. Endilikda suv omborida to`planadigan 500 mln kubometr miqdordagi suv Surxondaryoda 103 ming gektardan oshiq er maydonini sug`orish imkoniyatini yaxshilaydi. Eng asosiysi, suv ombori qoshida suv omborlari va GESlar holatini monitoring qilishga ixtisoslashgan texnik tizimlarni nazorat qiluvchi dispetcherlik-nazorat punkti tashkil etilgan. Mazkur punktda suv omborlari to`g`onlarini mustahkamlash va doimiy nazorat qilish, xavfsizligini ta`minlash borasida nazorat ishlari olib boriladi.