2020 yilniing 29 noyabr kuni soat 21:00 da Urgut tumani bo`yicha IIO FMB xodimlari tomonidan o`tkazilgan tezkor tadbirda 23 yoshli Abbos K., Urgut tumani «Mirzabog`lon-Chep» mahallasida tadbir ishtirokchisi sifatida jalb qilingan fuqaroga o`tkir hidli “geroin” giyohvandlik vositasiga o`xshash moddani 3 mln. so`m va 300 AQSh dollariga sotgan vaqtida ushlanib, tegishli tartibda hujjatlar rasmiylashtirilgan. Bu haqda O`zbekiston Respublikasi IIV huzuridagi Tergov departamenti xabar bermoqda.
Tezkor tadbir davomida Abbos K., mazkur giyohvandlik vositasini 2020 yilning 29 noyabr kuni soat 20:30 da mahalladoshi 28 yoshli Abdullo O., dan sotib olganligi hamda tadbir ishtirokchisi bergan 3 mln. so`m va 300 AQSh dollarini Abdullo O.,ga berganligi aniqlanganligi sababli Abdullo O., shaxsiy tintuv qilinib, undan tadbirda ishlatilgan 300 AQSh dollari va 3 mln. so`m pullar ashyoviy dalil tariqasida rasmiylashtirib olingan.
Sud-kimyoviy ekspertiza xulosasida, Abbos K., dan olingan modda tarkibida giyohvand modda-diasetilmorfin mavjudligi, bu “geroin” giyohvandlik vositasi turiga kirishi, uning sof og`irligi 4.27 grammga teng ekanligi ko`rsatilgan.
Mazkur holat yuzasidan Abbos K., va Abdullo O., lariga nisbatan Urgut tumani bo`yicha IIO FMB huzuridagi Tergov bo`limi tomonidan O`zbekiston Respublikasi Jinoyat kodeksining 273-moddasi 5-qismi (Giyohvandlik vositalari, ularning analoglari yoki psixotrop moddalarni ko`p miqdorda qonunga xilof ravishda sotish) bilan jinoyat ishi qo`zg`atilgan.
Tergov jarayonida Abbos K., va Abdullo O., larga nisbatan ayb e`lon qilinib, “qamoqqa olish” tarzidagi ehtiyot chorasi qo`llanilgan.
Hozirda tergov harakatlari olib borilmoqda.
