Prezident tomonidan berilgan alohida topshiriqqa muvofiq, ijtimoiy ahamiyatga ega bo`lgan oziq-ovqat mahsulotlari narxlarini manipulyasiya qilish, ularga bo`lgan sun`iy tanqislikni vujudga keltirishga qarshi kurashish orqali narxlarning barqarorligini ta`minlash borasida prokuratura organlari tomonidan barcha zaruriy choralar ko`rib kelinmoqda. Bu haqda Bosh prokuratura Matbuot xizmati xabarida aytilgan.
Respublika dehqon bozorlariga prokuratura xodimlari biriktirilib, ular doimiy asosda narxlarning barqarorligini ta`minlash, ishlab chiqaruvchilarni dehqon bozorlariga to`sqinliksiz kirib kelishi hamda bu boradagi korrupsiyaga qarshi kurashish tadbirlari amalga oshirilmoqda.
Narxlarni doimiy o`rganilishi natijalari bo`yicha narx oshishi ehtimoli yuqori bo`lgan hududlarga 220 ming tonna mahsulotlar keltirilib, narxlar mo``tadillashtirib borildi.
Shuningdek, dehqon bozorlarida 1 830 ta rasta va savdo nuqtadan iborat oziq-ovqat mahsulotlarining arzonlashtirilgan yarmarkalari tashkil etilib, ularda mahsulotlar boshqa rastalarga nisbatan arzon sotilmoqda.
Ko`rilayotgan bu kabi choralar narxlarning asossiz o`sib ketishini oldini olishga xizmat qilmoqda.
Qish-bahor mavsumida zaxira tadbirlarini tashkil etishning moddiy asoslari yaratilib, tasdiqlangan grafikka muvofiq, mahalliy hokimliklar tomonidan bugungi kun holatiga 791,4 ming tn. yoki rejaga nisbatan 99,6 % asosiy turdagi oziq-ovqat mahsulotlarining zaxirasi jamg`arildi.
Aholiga qulaylik yaratish maqsadida kichik ekobozorlarni tashkil etish bo`yicha zarur er maydoni ajratilib, tarmoq jadvallariga muvofiq 10 dekabr holatiga ularning 363 tasi foydalanishga topshirildi.
Narxlarni asossiz oshirish holatlariga nisbatan o`tkazilgan tadbirlar natijasida mahsulotni qimmat sotilishining oldi olinib, jiddiy qonunbuzilish holatlari bo`yicha jinoyat ishlari qo`zg`atilmoqda.
Hozirda mahalliy hokimliklar bilan birgalikda Yangi yil bayrami arafasida arzonlashtirilgan mahsulotlar yarmarkasi o`tkaziladigan joylar belgilanib, dehqon-fermerlarni biriktirish ishlari amalga oshirilmoqda.
Oziq-ovqat mahsulotlari narxlarining barqarorligini ta`minlash bo`yicha ishlar prokuratura organlari tomonidan alohida nazoratga olingan.
Yangi yil bayrami arafasida ijtimoiy ahamiyatga ega bo`lgan oziq-ovqat mahsulotlari taqchilligining vujudga kelmasligi hamda narxlarning mo``tadil saqlanishini ta`minlashga prokuratura organlari kafolat beradi.
Fuqarolar asosiy turdagi oziq-ovqat mahsulotlari narxlarining asossiz ravishda oshirilish holatlariga, shuningdek ishlab chiqaruvchilar, fermerlar, dehqon xo`jaliklari hamda tomorqa er egalari dehqon bozorlarida o`z mahsulotlarini sotishda turli to`siqlarga duch kelgan taqdirda Bosh prokuratura huzuridagi Departamentning 71 233 10 07 raqamli ishonch telefoniga murojaat qilishlari mumkinligini eslatib o`tamiz, deyiladi xabarda.
