Avval xabar berganimizdek, joriy yilning 9 dekabr kuni Yakkabog` tumanida er-xotin janjali oqibatida erkak qaynonasi, homilador xotini va ikki nafar bolani chavaqlab tashlagan edi.
Shundan so`ng, ushbu qotillik yuzasidan qo`shimcha ma`lumotlar taqdim etildi.
Ayni paytda Qashqadaryo viloyati IIB Axborot xizmatning xabar qilishicha, mazkur jinoyat ishi yuzasidan “Eski Yakkabog`” mahallasida qotillik jinoyatining kelib chiqish sabablari va bunga olib kelgan shart-sharoitlar yuzasidan muhokama yig`ilish bo`lib o`tdi.
Unda viloyat ichki ishlar boshqarmasi boshlig`i polkovnik Sh.Satvoldiev, viloyat hokimi o`rinbosari D.Allaev, prokuratura va Yakkabog` tumani sektor rahbarlari hamda mahalla faollari, jinoyat sodir etgan shaxsning oila a`zolari ishtirok etdi.
Ma`lum bo`lishicha, Qamashi tumanidagi “Qiziltepa” mahalla fuqarolar yig`ini Bunyodkor ko`chasida yashovchi mavsumiy ishchi Xazratqulov Abdimurod 2019 yilning dekabrda Yakkabog` tumani “Eski Yakkabog`” mahallasida yashovchi Muxamadieva Marjona bilan nikohdan o`tib yashab kelgan. Eri bilan kelishmovchilik tufayli shu yil mart oyida Marjona Yakkabog` tumani “Eski Yakkabog`” mahallasida yashovchi onasining uyiga qaytib kelgan.
Shu orada er bo`lmish Abdimurod xotini Marjonaning homiladorligidan xabar topib, uni o`ldirish uchun 2020 yil 9 dekabr kuni soat 23.45larda qaynonasining uyiga kelib devordan oshib hovliga kirgan. Marjona ikki nafar jiyani hamda onasi bilan yotgan uyning eshigini buzib kirib, qo`lidagi pichoq bilan to`rt odamning hayotiga zomin bo`lgan.
Kelgusida bu kabi mudhish jinoyatlarning oldini olishga nafaqat profilaktika inspektori, balki mahalla rahbariyati, qolaversa har bir sektor rahbarlari ham javob berishga majburligi ta`kidlab o`tildi. Buning uchun tumandagi eskicha usulda ish ko`rayotgan mahalla raislari va a`zolari ishini qaytadan ko`rib chiqish, pirovardida fuqarolarning maishiy va boshqa muammolarini bartaraf etadigan oqil va kayvoni insonlarni oqsoqol qilib saylash lozimligi ishtirokchilarga uqtirildi.
Muhokamada holat yuzaga kelishiga mas`ul mutasaddi idoralar vakillaridan voqea bo`yicha izoh so`ralib, o`z ishiga sovuqqonlik bilan yondoshgan oqsoqol va rahbarlarga tegishli jazo choralari belgilandi.
Eslatib o`atmiz, mazkur holat yuzasidan Yakkabog` tuman prokuraturasi tomonidan Xazratqulov Abdimurodga nisbatan O`zbekiston Respublikasi Jinoyat kodeksining 97-moddasi 2-qismi tegishli bandlari bilan jinoyat ishi qo`zg`atilib, dastlabki tergov harakatlari olib borilmoqda.
