Avval xabar berganimizdek, 16-dekabr kuni soat 16:30 larda Chilonzor tumanidagi “Toshkent savdo markazi” kompleksi hududidagi 5-blok, “G” qator, 127-savdo do`koni oldida 1995 yilda tug`ilgan N.M. akasi, 1991 yilda tug`ilgan O.M.ni o`ng ko`krak qo`ltiq osti sohasiga bir marotaba pichoq bilan urib, o`ldirgan.
Ushbu mudhish qotillik tafsilotlari "Bu kun" dasturida ma`lum qilindi.
Ushbu bozorda savdo qiluvchi, voqeaga guvoh bo`lgan fuqarolarning aytishicha, har ikki yigit ham mazkur bozorda ishlab kelishgan. O`sha kunggi aka-uka o`rtasidagi janjal pul majorosidan kelib chiqqan. Ular do`kondagi tovar va u bilan bog`liq pul yuzasidan tortishib qolishgan va vaziyat jiddiylashib ketgan. Uka o`zi ishlaydigan do`kondan pichoqni olib, akasining o`ng ko`krak qafasiga tiqib olgan, odamlar aralashuvi bilan uka boshqa tomonga, aka esa boshqa tomonga ketgan. Biroq, bir necha qadam yurgach, jabrlangan yigit ko`p qon yo`qotigani sabab yiqilgan. Uni Zangiota tumanidagi shifoxonaga olib borishgan, biroq ko`rsatilgan yordamga qaramay, jabrlanuvchi O.M. vafot etgan.
Holat yuzasidan ma`lumot bergan Chilonzor tumani IIB Tergov bo`limi tergovchisiga ko`ra, marhum bir necha marta Jinoyat kodeksining turli bandlari bilan sudlangan. Aydbor uka ham shu yilning avgust oyida jinoyat sodir etgan bo`lib, hozir ushbu jinoyat tugallanmay turib, qayta jinoyatga qo`l urgan. Ma`lum qilinishicha, hozirda aybdor ushlangan va unga nisbatan qamoqqa olish tarzidagi ehtiyot chorasi qo`llanildi.
