2020 yil 17 dekabr kuni soat taxminan tungi 2–3 lar atrofida A-373 – «Guliston–Ohangaron» avtomobil yo`lining Pskent tumani hududidan o`tgan 87-kilometrida noma`lum shaxs piyodani urib yuborib, jabrlanuvchiga yordam ko`rsatmasdan, voqea joyidan qochib ketgan. Bu haqda Toshkent viloyati IIBB Axborot xizmati rahbari xabar bermoqda.
Voqea sodir bo`lgan joyni o`rganish asnosida u erdan yuk mashinasiga taalluqliligi taxmin qilinayotgan bir necha ashyoviy dalillar topilgan. Yo`lning asfalt qoplamasidagi tormoz izlari ham yuk mashinasiga tegishli ekanligi taxmin qilinmoqda. Hozirda ushbu transport vositasini topish bo`yicha qidiruv va surishtiruv ishlari olib borilyapti.
IIBB yo`l harakati xavfsizligi boshqarmasi ushbu voqeani ko`rgan yoki eshitgan fuqarolardan (71) 265-08-51 yoki 265-96-53 telefon raqamlariga qo`ng`iroq qilib, jinoyat fosh etilishiga hissa qo`shishlarini so`raydi. Xabar bergan fuqaroning shaxsi sir saqlanishi kafolatlanadi, deyilmoqda xabarda.
