Qarshi tumani Qovchin MFYda yashovchi, “Agrobank” ATB Qamashi filialida ishlovchi M.Sh. nafsini jilovlay olmaydigan shaxslar toifasidan bo`lib chiqdi.
U 2019 yil may oyidan 2020 yil 30 sentyabr kuniga qadar bankning Yuridik xizmat bosh yuristkonsulti vazifasida ishlab kelib, firibgarlik, ya`ni aldash yoki ishonchni suiiste`mol qilish yo`li bilan o`zganing mulkini qo`lga kiritish jinoyatini sodir qilgan.
Jumladan, M.Sh. 2020 yil aprel oyida fermer xo`jaligi raisi O.B.ning yashash xonadoniga borib, kredit qarzini to`liq to`lashini aytib, to`lagandan so`ng unga boshqa kredit chiqarib berishni va`da qilib, uning ishonchini qozaonadi. O.B.dan chorva kreditidan bo`lgan qarzini yopish uchun 2 mln. 500 ming so`m pullarini olib, bankka to`lamasdan, o`z ehtiyojlari uchun ishlatib yuborgan.
M.Sh. 2020 yil may oyida “Agrobank” ATB Qamashi filialiga kredit olish uchun murojaat qilgan Sh.Q.ning tegishli hujjatlari asosida ajratilib, MChJga o`tkazilgan 20 mln. so`m kredit pullarini naqd pul shaklida olishni va boshqa korxonadan tikuv mashinalari olib berishni va`da qiladi. Ajratilgan 20 mln. so`mni 13 foizga, ya`ni 17 mln. 400 ming so`mga naqdlashtirib olgandan so`ng, 7 avgust kuni mijoz Sh.Q.dan tikuv mashinasi olib berishni aytib, 10 mln. so`m pullarini qo`lga kiritadi. Lekin tikuv mashinasi olib bermaydi va pullarini qaytarishni ham unutadi.
Shuningdek, yana bir fermer xo`jaligiga “Belarus 80-X” rusumli traktor sotib olish uchun “Agrobank” ATB Qamashi filiali tomonidan ajratilgan kredit qarzini qoplatish uchun fermer xo`jaligi raisi U.O.ning yashash uyiga borib, kredit qarzini to`lashini aytib, uning plastik kartasidan 12 mln. so`m, ishchilari N.M.ning plastik kartasidan 3 mln. so`m, S.X.ning ham plastik kartasidan 3 mln. so`m o`zining plastik kartasiga o`tkazib berilgan jami 18 mln. so`m pullaridan 4 mln. 500 ming so`mini fermer xo`jaligining paxta krediti uchun to`lab berib, qolgan 13 mln. 500 ming so`m pullarni o`z ehtiyojlari uchun ishlatib yuborgan.
Bundan tashqari, M.Sh. tadbirkor tanishi Z.S.dan 2 mln. so`m qarz olib, qarzini qaytarib berishni so`raganda unga imtiyozli kredit chiqarib berishni va`da qilib, o`zganing 2 mln. so`m pullarini qaytarib bermagan.
Alqissa M.Sh. 4 ta holatda o`zgalarning 28 mln. so`m pulini qo`lga kiritib, shaxsiy ehtiyojlariga ishlatib yuborgani uchun Qamashi tumani prokuraturasi tomonidan jinoyat ishi qo`zg`atilib, dastlabki tergov harakatlari olib borilmoqda.
