Avval xabar qilganimizdek, joriy yilning 14 yanvar kuni yarim tunda ijtimoiy tarmoqlarda Tojikiston hududida joylashgan “Bahri tojik” (Qayroqqum) suv ombori yorilishi natijasida suv toshqini sodir bo`lganligi to`g`risida yolg`on xabarlar tarqaldi. Bu xabar aholining vahimaga tushishiga sabab bo`ldi va yarim tunligiga qaramay, ko`plab fuqarolar uyini tark etdi.
Holat Sirdaryo viloyati hokimligi tomonidan tezkor o`rganilib, viloyat hokimi boshchiligidagi mas`ullar aholini tinchlantirish choralarini ko`rdi.
Shundan so`ng, O`zbekiston Suv xo`jaligi vazirligi ushbu tarqalgan xabarning asossiz ekani, yolg`on mish-mishligini aytib, rasmiy munosabat bildirdi.
Davom ettirilgan surishtiruvlar natijasida Tojikistondagi Qayroqqum suv omboriga shikast etgani haqidagi yolg`on mish-mishlar tarqatib, Sirdaryo aholisining tinchini buzganlar aniqlanib, qo`lga olindi. Ma`lum qilinishicha, xabarni Mirzaobod, Sardoba va Oqoltin tumanlarida yashovchi shaxslar tomonidan asossiz ravishda tarqatilgan.
Qo`lga olingan fuqarolarning biri tanishlaridan eshitgan xabarlariga tayanib, Sardobada istiqomat qiluvchi turmush o`rtog`iga 14 yanvar kuni qo`ng`iroq qilib uyni tark etishini tayinlaydi. Buning oqibatida tumanning Do`stlik mahallasida istiqomat qilayotgan aholi o`rtasida sarosima uyg`onadi. Shundan so`ng ayol Tojikistonda yashaydigan tog`asiga qo`ng`iroq qilib, bu xabar rost yoki yolg`on ekanini so`raydi. Tog`asi bunday xabar yo`qligi, hammasi joyida ekanini ma`lum qiladi. Lekin bu paytga qadar aholi o`rtasida vahima tarqalib ulgurgan edi.
Sirdaryolik blogerlardan biri esa You tube'dagi kanaliga "Tezkor tarqating! Kanal suvi urib ketti" sarlavhali qochishga undovchi videoni yasab tarqatgan.
Yolg`on ma`lumot tarqatgan shaxslar jinoiy javobgarlikka tortilishi ma`lum qilindi.
