Baxt bag`ishlovchi toza ruh manbayi ham til, yomonliklar keltiruvchi nahs yulduzining chiqar joyi ham til. Tilini tiyolgan odam – donishmand, oqil, so`zga erk bergan odam - beandisha va pastkash. Til shirin va yoqimli bo`lsa yaxshi, til bilan dil bir bo`lsa yana yaxshi. Til bilan dil - insondagi eng yaxshi a`zolardir. Bo`stonda - gulsafsar, gulg`uncha va rayhonlar eng yoqimli gullardir.
Odam - tili bilan boshqa hayvonlardan imtiyozlidir. Uning tili orqali boshqa odamlardan afzalligi bilinadi. Til - shuncha sharafi bilan nutqning qurolidir. Agar nutq noma`qul bo`lib chiqsa - tilning ofatidir.
****
O`N SAKKIZ YoSh HAYRATLARI
O`n sakkiz ming olam oshubi agar boshindadur,
Ne ajab, chun sarvinozim o`n sakkiz yoshindadur.
Desa bo`lg`aykim, yana ham o`n sakkiz yil husni bor,
O`n sakkiz yoshina muncha fitnakim boshinadur.
O`n sakkiz yil dema, yuz sakson yil o`lsa, uldurur,
Husn shohi, ul balolarkim, ko`zu qoshinadur.
Hayrat etmon husni naqshidaki, har hayratki, bor,
Barchasi ezid taolo sun`iy naqqoshinadur.
Tan anga siymu ichina tosh muzmar ko`nglidin,
Aqlg`a yuz hayrat, ul oyning ichu toshinadur.
May ketur, ey mug`ki, yuz hayrat aro qolmish Masih,
Bul ajablarkim, bu eski dayr xuffoshindadur.
To Navoiy to`kti ul oy furqatidin bahri ashk,
Har qachon boqsang, quyosh aksi aning yoshindadur.
Alisher Navoiy
