Bugun, 1 fevral kuni AOKAda o`tkazilgan brifingda Mahalla va oilani qo`llab-quvvatlash vazirligi axborot xizmati rahbari Saodat Boymirzaeva shahar va qishloqlarda mahallalar soni va ularning qanday hududda joylashgani haqida ma`lumot berdi.
2021 yil 1 yanvar holatiga ko`ra, yurtimizda 9 168 ta fuqarolar yig`ini mavjud bo`lib, ularning:
8 877 tasi — mahalla fuqarolar yig`ini;
161 tasi — ovul fuqarolar yig`ini;
89 tasi — qishloq fuqarolar yig`ini;
41 tasi — shahar fuqarolar yig`inidan iborat.
Mazkur fuqarolar yig`inlarining 10 tasi — jamoatchilik asosidagi,
11 tasi — harbiy shaharchalarda joylashgan fuqarolar yig`inlari hisoblanadi.
Eng ko`p — 1000 dan oshiq mahallaga ega hudud sifatida Samarqand viloyati etakchilik qiladi. Bu viloyatda hozirgi vaqtda 1 100 ta mahalla fuqarolar yig`ini mavjud. Undan so`ng Toshkent viloyati 10 48 ta, Farg`ona viloyati 1041 ta mahalla bilan keyingi o`rinlarni band qilgan.
Fuqarolar yig`inlarining geografik joylashuviga to`xtaladigan bo`lsak, respublikamizdagi 1 830 ta mahalla fuqarolar yig`ini — shaharlarda, 1 205 tasi — tuman markazlarida joylashgan.
Tuman markazigacha 30 km bo`lgan masofada joylashgan mahallalar soni — 4 839 tani, tuman markazidan 30 km va undan olis masofada, tog`li va cho`l hududlarda joylashgan fuqarolar yig`inlari soni — 720 tani tashkil etadi.
Chegara yoki anklav hududlarda joylashgan fuqarolar yig`ini soni esa 574 tani tashkil etadi.
