Romitan tumanlararo iqtisodiy sudi raisi Yuridik texnikumda ochiq sayyor sud majlisi o`tkazdi

Romitan tumanlararo iqtisodiy sudi raisi A.Safarov tomonidan Buxoro yuridik texnikumida texnikum talabalari ishtirokida ochiq sayyor sud majlisi o`tkazildi. Sayyor suddan so`ng sud raisi talabalar bilan o`zaro muloqotda sud majlisida ko`rilgan iqtisodiy ish bo`yicha chiqarilgan hal qiluv qarorini batafsil tushuntirib berib, amaldagi qonunchilik asosida qanday asoslar va nima sabablarga ko`ra shunday hal qiluv qarori chiqarilganligini tushuntirib berdi.

Sayyor sud majlisida ko`rilgan iqtisodiy ish bo`yicha da`vogar tomonidan sudga da`vo arizasi kiritishda qanday prosessual normalarga rioya etilganligi, nizoni sudgacha hal etish tartib-taomiliga rioya qilishda nimalarga e`tibor qaratilishi kerakligi, talabnoma yuborish tartibi, da`vo arizasini tuzish va uni asoslashda e`tibor qaratilishi lozim bo`lgan jihatlar, shartnoma tuzishda taraflar qanday holatlarni e`tiborga olishlari lozimligi to`g`risida ma`lumot berildi.

Talabalar sud majlisi jarayonining borishi, sud majlisida amalga oshiriladigan prosessual harakatlar va ularni amalga oshirish tartibi to`g`risida savollar bilan murojaat qilib, ularga batafsil javob oldilar.

Ochiq muloqot davomida talabalarga sud-huquq sohasida qonunchilikka kiritilgan o`zgartirish va qo`shimchalar, “Bir sud – bir instansiya” taomili haqida batafsil ma`lumot berildi hamda ular sud raisidan o`zlarini qiziktirgan boshqa savollarga ham javob oldilar.